Toqutsinermik sulialik: Ikioqatigiilluta pinerlunneq peqqarniitsoq paasiniartigu

Ilulissani toqutaasup aqqa saqqummiunneqarniariarmat inuit politiinut siarngutilerput. Saaffiginnittut suli amerliartornissaat, pinerlunnermut paasiniaanermi aqutissup neriuutigaa.
- Misissugassarpassuaqarpugut paasiniagassarpassuaqarlutalu. Apersuinissat aamma suli amerlapput. Misigissugassaqaqaagut sanilliussassaqaqalutalu. MIsissugassat soorlu DNA-t inussat ipaat aamma nassaat tigussaasut allat misissugassaraavut. Paasiniagassat suli amerlaqaat, pinerluttoqarsimaneranik paasiniaasartut aqutsisuat nassuiaavoq, Jan Lambertsen oqarpoq. Assi © : Kathrine Kruse
oktobarip 14-at 2021 16:36

Ilulissani toqutaasimasutut ilimagineqartup 24-inik ukiullip aqqa marlunngormat saqqummiunneqarpoq, tamannalu paasiniaanermut iluaqutaavoq.

Pinerlunnermut paasiniaanermi aqutsisoq Jan Lambertsen taama oqarpoq.

- Saaffiginnittut unissimagaluartut atermik saqqummiussinitta kingorna saaffiginnittut amerleqqipput, oqarpoq nangillunilu: 

- Toqutaasup nassaarineqarnissaata tungaanut piffissani sumiiffinnilu assigiinngitsuni takunnissimallutik innuttaasut saaffiginnipput. Taamaaliornerallu uagutsinnut pingaaruteqartorujussuuvoq, pisup tungaanut susoqarsimanerata paasinissaa misissuinermut ilaammat.

AAMMA ATUARUK Toqutsinermut suliaq paasisaqarfiunerusoq

Ilulissani ikuallaavimmi inuup timaata ilaanik nassaartoqarneranit sapaatit akunneri marlungajaat ingerlareerput, maannalu inuit marluk pasineqarput.

Kingorna timip ilaanik ataatsimik nassaartoqaqqippoq, nassaarineqartorlu kinaassusersineqarluni.  

Misissugassarpassuit

Paasiniaasartut aqutsisuata neriuutigaa innuttaasut saaffiginnissutaat pinerlunnerup pinnginnerani susoqarsimaneranik paasisaqarnerunissamut iluaqutaassasut.

- Attaviginnissaagut apersuillutalu, taava paasinarsissaaq toqutaasup timaata nassaarineqarnissaata tungaanut susimaneranik ilimatsaassinerput ilumoornersoq, Jan Lambertsen oqarpoq.

AAMMA ATUARUK Politeeq Ilulissani toqutsisoqarsimaneranik suliaq pillugu: Assingusumik takusaqarnikuunngisaannarpunga

Saaffiginnissutit saniatigut politiit misissugassarpassuaqarput.

- Misissugassarpassuaqarpugut paasiniagassarpassuaqarlutalu. Apersuinissat aamma suli amerlapput. Misigissugassaqaqaagut sanilliussassaqaqalutalu. MIsissugassat soorlu DNA-t inussat ipaat aamma nassaat tigussaasut allat misissugassaraavut. Paasiniagassat suli amerlaqaat, pinerluttoqarsimaneranik paasiniaasartut aqutsisuat nassuiaavoq.

Pinerlunneq peqqarniitsoq

Pinerlunnermut paasiniaanerminni politiit suli innuttaasunut ikioqqupput.

- Imaassinnaavoq arlaat saqqummiukkusunngisaminik maluginiagaqarsimasoq. Taakkununnga ima kaammattuerusuppugut: PInerlunneq ima amiilaarnartigaaq imalu peqqarniitsigaaq tamatta paasiniaanermut ikiuuttariaqarluta, Jan Lambertsen oqarpoq. 

AAMMA ATUARUK Ilulissani timip ilaanik nassaarneq: Politiit toqussutaasoq paasigaat

Suliami angut arnarlu pasineqarput.

Angut toqutsisimasutut pasineqartoq sapaatit akunnerini sisamani tigummigallagaavoq, arnarlu arlaatigut peqataasimasutut pasineqarluni. 

Arnaq akunnerni 72-ini tigummigallagaareerluni iperarneqarpoq. 

Politiit uunga sianerifigisinnaavatit: 701448.