Toqutaasimasoq Ilulissani ikuallaavimmi nassaarineqarpoq.Assi: Kathrine Kruse

Toqutsinermi agguisoqarneranut atatillugu suliaq ima ingerlanneqassaaq

Ilisimannittut qulit aggersarneqarput, nunatsinnilu peqqarniinnerpaamik toqutsinerit ilaannik suliap ullumi aallartinnerani unnerluutigineqartoq Ilulissani eqqartuussivimmiissaaq.

Nunatsinni toqutsisimanerni peqqarniilliuinnarnerpaaq pillugu eqqartuussineq ullumi aallartinneqassaaq.

Suliaq Ilulissani Qaasuitsup Eqqartuussisoqarfiani suliarineqassaaq, ullunilu sisamani ingerlanneqassalluni: Ataasinngornermi, marlunngornermi, pingasunngornermi sisamanngornermilu.

Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq, taannalu taamani 29-nik ukioqarpoq.

Ilulissani toqutsillunilu agguisoqarnera

 

Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.

 

Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

 

Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip arfineq-aappaani aamma peqqarniitsumik nakuusersimasututut aamma unnerluutigineqarpoq.

 

Tamanna KNR-ip allagaatinik takunniffigisaanik unnerluussissummi allassimavoq.

 

Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqassaaq.

Kalaallit Nunaata Politiivisa Marutha Thayapharan suliami unnerluussisussaatitaasorivaat. KNR-imut allakkatigut akissummini taanna ima paasissutissiivoq:

  • Unnerluutigineqartup oqaaseqarnissani kissaatigippagu ullumikkut nammineerluni nassuiaasinneqassaaq
  • Taanna Nuummi pinerluuteqarsimasunut inissiisarfimmi tigummigallarneqarpoq, Qaasuitsup Eqqartuussisoqarfianilu najuutissalluni.
  • Ilisimannittut katillugit qulit aggersarneqarput. Taakkua tamarmik - pilersaarut malillugu - aqagu marlunngornermi killisiorneqassapput.
  • Eqqartuussutip sisamanngornermi ualikkut aalajangiiffigineqarnissaa naatsorsuutigineqarpoq.

Unnerluussisussaatitaasut Pinerluttulerinermi Inatsimmi paragraf 161 naapertorlugu angutip piffissami killiligaanngitsumi tigummineqartussanngortinneqarnissaa piumasaraat.

Tamanna ima isumaqarpoq, angut piffissami killiligaanngitsumi pineqaatissineqarsimasunut inissiisarfimmiittussanngortinneqartillugu.

Unnerluutigineqartup illersuisuata, Finn Meinelip, unnerluussut qanoq iginerertik pillugu oqaaseqarusunngilaq.

Toqungasup timaata aggorneri eqqaavimmut igikkai

Unnerluussut naapertorlugu najugaqarfiit ilaanni siorna septembarip 29-anni nalunaaquttap 00:15-ip 11:00-llu akornanni toqutsineq pisimavoq.

Qanoq ilineranik ilisimaneqanngitsumik, ilimanarluni niaquata anaalerneranik, savimmik kapoorneranik imaluunniit qungasiata kipineratigut toqussimagaa, KNR-ip allagaatinik takunniffigisaani unnerluussissummi taama allaqqavoq.

Unnerluutigineqartorlu pillugu aamma allaqqavoq:

 Toqoreernerata kingorna imaluunniit kinguninngua niaquata tunuatungaatigut aammalu pukusuata nalaatigut qasseeriaqaluni kapoorsimagaa kilertitersimagaaluunniit kingornalu timaa aggoriarlugu aggukkani piffimmi pinerluffiup qanittuani eqqaavimmut igissimagai taakkulu kingornatigut Ilulissani ikuallaavimmukaanneqarsimasut.

- Immikkut illuinnartunik toqutsinermi suliaqarnikuuvugut. Kisianni uunga assersuunneqarsinnaasunik suliaqarnikuunngilagut, nunatsinni polimesteri Bjørn Tegner Bay KNR-imut taama oqarpoq.

- Nunatsinni toqutsinermi agguisoqarnikuuvoq, kisianni tamanna qangali pivoq. Kisianni toqungasup eqqagassat akornannut toqqorneqarnera nalaannikuunngilarput.

Toqutaasup timaata ilaa siullermik siorna oktobarip aappaanni nassaarineqarpoq.

Toqutsereernermit ullut tallimat qaangiuttut unnerluutigineqartoq tigusarineqarpoq, taannalu tassanngaanniilli tigummigallarneqarsimavoq



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl