Toqutsinerit ukioq manna qaffasipput

Toqutsinerit ukioq manna amerlaqisut radioaviisimi ullaaq tusarliupparput, toqutsinerit ukioq manna qulingiluanngoreersimallutik. Ukiut 2000-it aallartimmatali 2002-mi amerlanerpaammata arfineq-pingasut toqutaapput, ukiormannalu ukiup qeqqa qaangiutiinnartorlu amerlassusaat qaangereersimallugit.

Toqutsinerit nunarput tamakkerlugu pisarsimapput,

Upernavimmi, Nanortalimmi, Nuummi Illoqqortoormiunilu toqutsisoqarsimalluni.

Toqutsinerit qanoq pisimanersut misissoraanni, tallimat savimmik toqutsinermik pisimapput, pingasut aallaammik, ataaserlu unataanermik peqquteqartumik toqutsinerusimalluni.

-Ukiup qanoq ilinera eqqarsaatigissagaanni oqarsinnaavunga kisitsisit qaffasissut, kisianni massakkut nalilersinnaanngilara ukioq naappat amerlassusaat marloriaatinngorsimassanersut. politimesteri Anders Linnet oqarpoq.

Erseqqissaatigaali soorunami neriuutiginagu aammalu taamaattariaqanngitsoq, kisianni imaassinnaasoq ukioq manna toqutsinerit amerlassusaat ukiunut allanut sanilliullugit qaffasinnerungaatsiassasoq.

Aamma oqarpoq, ukiut siulii assersuutigissagaanni toqutsinerit amerlanersaat savimmik toqutsinermik pisarsimasut.

Ukiut qulit kingulliit toqutsinerit ikiliartorsimagaluarput. 1990-ikkut aallartinnerini agguaqatigiissillugu ukiumut toqutsinerit 14-iusarsimallutik.

Toqutsinerit pinaveersaartinnissaat sapernaraluartoq ungasinnerusoq isigalugu pinaveersaartitsisoqarsinnaasoq Anders Linnet oqarpoq.

-Politiit toqutsinernut toqutseriarnernullu pinaveersaartitsisinnaanngillat, toqutsinerimmi tamatigut eqqarsaqqaarani puuarrallannernilu pisarput. Amerlanertigut aamma ilaqutariit iluanni pigajuttarput. Politimesteri oqarpoq.

Taamaattumik pinaveersaartitsinermik eqqarsartoqarnissaa pisariaqarnerarpaa, soorlu nakuusernermut pinaveersaartitsisoqartariaqartoq, siunissaq ungasinnerusoq eqqarsaatigalugu.

- Isumaqarpunga meeqqanut inuusuttuaqqanullu nakuusernermut pinaveersaartitsineq sukumiisumik ingerlanneqartariaqartoq. Politimesteri Anders Linnet oqarpoq.

Toqutsinerit saniatigut pingasunik ukiormanna toqutseriartoqarsimavoq.