Toqutsineq pillugu suliaq matoqqasumik ingerlanneqarpoq
Inuarneq Aasianni politiinut arfininngornermi ullaakkut nalunaarutigineqarpoq. Nukappiaraq 16-inik ukiulik tigusarineqatsiaannarluni eqqartuussivimmut sassartinneqarpoq sapaatillu akunnerini sisamani tigummigallagassanngortinneqarluni.
Nukappiaqqap illersuisuata atermik issuaanissamillu inerteqquteqartoqarnissaa piumasaraa. Pisoq pillugu tamaalilluni tamanut saqqummiussisoqarsinnaajunnaarpoq.
- Pisinnaatitaaffiuvoq periarfissarlu taanna atorparput, nukappiaqqap illersuisua Tom Ostermann oqarpoq, pisorlu pillugu oqaaseqaqqikkusunnani.
Nunatta Eqqartuussiviani eqqartuussisup Morten Wennickep, oqarnera naapertorlugu, atermik issuaanissamillu inerteqquteqaqqusineq Nunatta Eqqartuussiviani suliarineqartuni akuttusuumik atorneqartarpoq.
Atermik issuaanissamillu inerteqquteqartoqarnissaa Aasianni eqqartuussiviup aalajangerpaa.
Pasineqartoq 18-it inorlugit ukioqartillugu issuaanissamik inerteqquteqartoqartarpoq, Aasiannilu pisumi taamaattoqarpoq.
