Unnerluutigineqartoq ullumikkut aamma nipaalluinnarluni inimi eqqartuussiffiusumiippoq.Assi: Christine Hyldal/ KNR

Toqutsineq pillugu eqqartuussineq: Ilisimannittup unnerluutigineqartoq pinerliffigineqartorlu imeqatigisimagai

Ilisimannittut qulit eqqartuussivimmi suliap ulluata aappaani ilisimannittutut nassuiaateqariartoqquneqarput. Taakkunannga ataaseq suliamut atatillugu tigusaaqqanikuuvoq.

Angut ilisimannittutut nassuiaateqartarfimmi assani talluminiitsillugit issiavoq. Taassuma qarliit timersuutit qasertut tujuulorlu nasartalik Adidasimik meqqeqartoq atorpai.

Pissangalaarpoq. Taassumami ilisarisimasaa toqutsisutut toqungasullu timaanut iliuusissaanngitsumik iliuuseqarsimasutut suliami unnerluutigineqarpoq.

Taassuma ilisarisimasaa meterimik ungasitsigisumi illersuisumi, Finn Meinelip eqqaani issiavoq. Unnerluutigineqartoq ippassaq eqqartuussinerup aallarteqqaarneratulli oqaaseqanngivippoq. Ullumikkullu aamma nipaaqaluni kiinnamigut takussutissaqarani, eqqissisimalluni assani paarlallugit nerriviup saaminiittup qaaniitsippai.

Eqqartuussisup danskisut oqaluttup unnerluutiginnittup oqaasiinik nutserisoqassanersoq aperigaangamini qinngani annikitsumik eqillugulu niaqquminik annikitsumik ileqimisaartarpoq.

AAMMA ATUARUK Toqutsineq pillugu eqqartuussinerup ullua siulleq: Unnerluutigineqartoq toqutsinermi agguinermilu pinngitsuunerartoq

Unnerluussisussaatitaasut oqarnerat naapertorlugit unnerluutigineqartoq angummik Ilulissani siorna septembarip ulluisa 29-anni toqutsillunilu agguisimavoq. Ilisimannittutut nassuiaatigineqartoq politiinit piffissami sivikitsumi tigummigallarneqarpoq, kingornali iperagaalluni.

Sparimi unnukkut immiaararseqatigiittut

Toqutsisoqarnissaanut aqaguttoq unnukkut tassa septembarip ulluisa 28-anni ilisimannittup unnerluutigineqartoq toqutaasorlu Sparimi immiaararseqatigai. Tamatuma kingorna unnerluutigineqartup inigisaanukarput.

- Imerfissamik amigaateqaratta, ilisimannittoq unnerluutigineqartutulli 28-nik ukioqartoq nassuiaavoq.

Ilulissani toqutsillunilu agguisoqarnera

 

Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.

 

Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

 

Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip tallimaani aamma peqqarniitsumik nakuusersimasututut aamma unnerluutigineqarpoq.

 

Tamanna KNR-ip allagaatinik takunniffigisaanik unnerluussissummi allassimavoq.

Unnerluutigineqartoq toqutsisimasutut toqungasullu timaanut iliuuserineqartussaanngitsumik iliuuseqarsimasutut pinngitsuunerarpoq. Unnerluussissutigineqartulli sinneri nassuerutigai.

Taanna oqaaseqarusunngilaq.

 

Unnerluussisussaatitaasut piffissami killiligaanngitsumi parnaarussisoqarnissaa piumasaraat.

 

Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqarpoq.

Taassuma oqarnera naapertorlugu unnerluutigineqartoq ikinngutiginngilaa. Imminnut takuallaarneq ajorput – kisianni imminnut atassuteqarfigalutik, taanna eqqartuussivimmi nassuiaavoq.

Taassumali toqutaasoq meeraanerminniilli ikinngutigilersimavaa.

Ilisimannittutut nassuiaasup oqarnera naapertorlugu unnuk ernguffiuvoq.

- Angerlarama aalakoorpunga, taanna oqarpoq.

Taassuma inimi inuit pingasuusut eqqaavaa, tassanngaannarlu “savimmik qaqitsisoqarpoq”.

- Qanoq pinnguarisinnaanerlugu eqqartulerparput, ilisimannittoq oqarpoq.

- Sooq pinnguarissavarput? Navianartormi kingornatigut oqarpugna. Taamaammat ilivarput imeqqilerlutalu, taanna oqarpoq.

Taassuma oqarnera naapertorlugu imernerat nuannisarfiulluni akaaraqatigiinngittoqanngilaq.

Pinerliffigineqartoq pukusuatigut eqeqqagaa

Taassuma savittalimmik videoliortoqarnera eqqaamanngilaa. Unnerluussisussaatitaasup Marutha Thayapharanip oqarnera naapertorlugu video pinerluuteqarfigineqartup Facebookimi qupperneranut septembarip ulluisa 29-anni unnuami ikkunneqarpoq. Tassa taakku pingasuullutik unnerluutigineqartup inigisaani piffissami ernguffigisaanni.

Videoliami unnerluutigineqartoq pinerliffigineqartorlugu savillu iffiamut kitserut takuneqarsinnaapput.

Ilisimannittutut nassuiaateqartoq eqqamanngisamini piffimmi peqqiilligami – angerlarpoq. Taassumalu qanoq imigassartortigisimanerluni aamma eqqaamanngilaa.

 

Ilulissani Eqqartuussiveqarfik Qaasuitsumi eqqartuussisoqarpoq. Assi: Christine Hyldal/ KNR

 

Ingerlagami unnerluutigineqartup pinerliffigineqartoq pukusuatigut eqeqqagaa maluginiarpaa – kisianni kamassimasumiunani – inussiarnerpalaarnerusumik.

- Soorlu (unnerluutigineqartup pinerliffigineqartoq aaqq.) uninngatinniarsarigaa, ilisimannittoq oqarpoq.

- (Pinerliffigineqartoq aaqq.) ilaarusunnersoq aperaara, kisianni naaggaarpoq. Inissiamiiginnarluni.

Pinerluffigineqartup teqqiaa unnerluutigineqartup inigaaniittoq

Unnerluussisussaatitaasut oqarnera naapertorlugu toqutsineq agguinerlu septembarip ulluisa 29-anni nalunaaqutaq 00.15-ip 11.00-illu akornanni pivoq. Tassa erngunnerup unnuaani imaluunniit ullaavani.

Ilisimannittoq ulloq taanna iterami inissiamukaqqippoq. Taassuma oqarasuaatini peqanngimmat unnerluutigineqartup inaaniissinnaasoq eqqarsarpoq.

Inissiamut apuukkami unnerluutigineqartup aappaa naapippaa. Taanna eqqartuussivimmi ullumikkut aamma nassuiaateqartussaagaluarpoq, taannali takkussinnaanngilaq, Dronning Ingridip Napparsimmavissuaniillu eqqartuussivimmut nakorsap allagaa nassiunneqarpoq.

Unnerluutigineqartup aappaata pinerluffigineqartoq peqanngitsoq oqaatigaa. Oqarasuaat tammarpoq. Unnerluutigineqartup ilisimannittoq oqaluutinngikkaa ilisimannittoq oqaluttuarpoq. Taassuma pinerliffigineqartup teqqiaa inissiamiittoq takuaa. Aamma atisanik nerriviup qaaniittoqartoq takuaa. Taassumali atisat angutip arnalluunniit atisarinerai nalilersinnaasimanngilai.

AAMMA ATUARUK Toqutsinermi agguisoqarneranut atatillugu suliaq ima ingerlanneqassaaq

Unnerluutigineqartup aappaata savik ippassarmeersoq takutippaa. Savik ipuinnanngorsimavoq. Ipittortaa peersimavoq.

Ilisimannittup oqarnera naapertorlugu unnerluutigineqartup aappaata teqqiaq ilisimannittup nassassagaa oqaatigaa.

Taamaaliorporlu, tassangalu ingerlalluni. Taassuma saviup ipittortaa peersimasoq tupigusuutigisimallugu eqqartuussivimmi oqaatigaa.

Ilisimannittup pinerluuteqarfigineqartoq unnuk taanna takugamiulli takoqqinngilaa.

- Kingorna politiit angerlarsimaffinnukarput. Annilaarujussuarpunga, ilisimannittoq oqarpoq.

Maanna aatsaalaarpoq.

Inissiami aammik takussutissaqartoq

Unnerluutigineqartoq toqutsisutut toqungasullu timaanik iliuusissaanngitsumik iliuuseqarsimasutut pinngitsuunerarpoq.

Aamma eqqartuussivimmi oqaaseqarusunngilaq.

Affaldsforbrændingen i Ilulissat

Forbrændingsanlægget i Ilulissat, hvor ligdelene blev fundet. Foto: Christine Hyldal/ KNR

 

Ippassaq eqqartuussisoqarnerani arfininngornermi oktobarip aappaani Ilulissani ikuallaavimmi eqqakkat akornanni niumik nassaartoqarsimasoq oqaatigineqarpoq.

Aamma saviit puussiami plastikkimiittut inuup aavanik takussutissaqartut arlallit nassaaarineqarput.

Saviit katillugit assigiinngitsut arfinillit nassaarineqartut unnerluussisussaatitaasut toqutsinermut agguinermullu atassuserpaat.

Inuup timaata ilai pinerluffigineqartumeerput.

AAMMA ATUARUK Politimesteri toqutsinermi agguisoqarnera pillugu: Assingusumik nalaataqarnikuunngilagut

Unnerluutigineqartoq siorna oktobarip arfineq-pingajuanni tallimanngornermi tigusarineqarpoq. Pinerluttoqarnerani misissuisartut taassuma inissiaani pinerluffiusoqarsimaneranik misissuipput. Misissuinermi misissuutit assigiinngitsut pingasut atorlugit inuup aavanik takussutissaqarnersoq misissuisoqarpoq. Takussutissaqarporlu.

- Misissuutigut assigiinngitsut atoratsigit aammik nassaarpugut. Tamannami piffinnut aammik piiaaniarsarisoqarfiusumukaraanni nalinginnaasuuvoq, pinerluttoqarneranik misissuisartoq misissuisuusoq oqarpoq.

Taanna ilisimannittutut nassuiaateqartussatut ullumikkut aamma aggersarneqarpqo. Aamma toqungasup timaanik misissuisartoq timip ilaanik misissuisoq aamma aggersarneqarpoq.

Taassuma unnerluussisussaatitaasup, Marutha Thayapharanip ippassaq saqqummiussaa uppernarsarpaa: Tassa toquneranut pissutaasoq paasineqanngisaannartoq.

- Paasineqanngilaq, pissutigalugu timip atortui tamarmik nassaarineqanngillat. Toqungasup timaata ilarujussua amigaatigaarput, taanna oqarpoq.

Eqqartuussivimmi suliaq aqagu nanginneqassaaq, sisamanngorpallu eqqartuussut suaarutigineqassalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl