Toqutseriarsimasoq killiligaanngitsumik pineqaatissinneqartoq
Nunatta Eqqartuussisuuneqarfiata angut 34-nik ukiulik toqutseriarsimasutut arlaleriarlunilu nakuusersimasutut siorasaarisimasutullu marsip ulluisa 29-ani 2017-imi eqqartuuppaa. Eqqartuussisoqarfik Sermersuup eqqartuussutaa Nunatta Eqqartuussisuuneqarfiata atuuttussanngortippaa.
Toqutseriarineq Nuummi Centrum Grillip eqqaani ulloq aggustip arfernat 2015 pivoq, tassanilu eqqartuunneqartup angut alla niaquatigut ujaqqamik anaasimavaa savimmillu pukusuatigut kapillugu. Angut saassunneqarsimasoq annerusumik ajoqusernani qaamigut ikilerneqarpoq. Eqqartuunneqartoq toqutseriarnerminiilli tigummigallarneqalersimavoq.
Unnerluussisussaatitaanerusup Tobias Bergip Nunatta Eqqartuussisuuneqarfiata eqqartuussutaa iluarisimaarpaa.
- Unnerluussisussaatitaasuniit Nunatta Eqqartuussisuuneqarneqarfiata eqqartuussutaa iluarisimaarparput, suliarlu taamaalilluni naammassineqarpoq. Aammattaaq angutip siusinnerusukkut nakuusernermik eqqartuunneqartuarsimaneranut atatillugu angut Danmarkimi pinerluttunik isumaginnittoqarfiup ataaniittumi killiligaanngitsumik inissinneqartussanngornera unnerluussisussaatitaasunit iluarisimaarparput, Tobias Berg oqarpoq.
