Tysklandimi toqoraavinnut sorsunnersuarmi kingullermi juutinik toqoraasarfimmukaatitsisarnermut franskit naalagaaffiat pisuutitaavoq. Qimuttuitsunik angallassinermi qullersaqarfiup toqutaasut ilaqutaat tamaasa immikkut 450.000 koruuninik maanna akiliiffigisussanngorpai.
Ukiumi 1944-mi aasaagaa juutip Alain LePit-ip angutaa, ilaqutaalu Frankrigip kujasissuani illoqarfimmit Toulouse-mit Tysklandiliaanneqartinnagit Pariisip avatinnguaniittumut tigusanut ataatsimoortitsivimmukaanneqarlutik aallarunneqarput.
Qimuttuitsut ilaaffii perusuersartarfeqaratillu neriffissaqanngillat.
Angallanneranni akissat qimuttuitsuutileqatigiit Franskit naalagaaffiannut isumagisassanngortippaat.
Tysklandimulli assartorneqartinnagit iligiit Frankrigi tyskinit aniguisippaat, Alain LePit-illu angutaa akkaalu aniguisinneqarput.
Juuteqataalli 75.000-it Tysklandimi tigusanut toqoraavinnukaanneqarlutik toqoragaapput.
Franskit naalagaaffiata juutit toqutarpassuit ilaqutaannut akiliuumannginnerminnut tyskinit tiguaaqqaneqarnerminni pisimammat utoqqatsissutiginiartarsimagaluaraat, maanna Franskit naalagaaffiat akiliisussanngortinneqarpoq.
Franskit præsidentiata Jacques Chirac-ip nassuerutigaa sorsunnerup nalaani juutit tyskinut toqutassanngortinneqarsimasut franskit naalagaaffiata akisussaaffigigai.