Toqusut inaanut puiorneqarsimasumut ilaqutaasoq: Tupannaqaaq
Angut Nanortalimmi siorna aggustip qaammataani toqukkut qimaguppoq.
Taanna septembarip qaammataani ilineqarpoq – imaluunniit ilaqutai taama eqqarsarput.
Illerfiummi nunamut matoorneranit qaammatip aappaata affaata qaangiunnerani – angut suli toqusut inaanniittoq paasineqarpoq.
Knr.gl-ip tamanna ataasinngormat saqqummersippaa, tassanilu ilaqutaasut kinaassutsiminnik isertuussinissartik kissaatigaat. Ilaqutaasut ilaat, Ungaaq Lundblad isummaminik maanna allanngortitsivoq.
- Soorunami tupannaqaaq taamak nalaataqarluni, isumaqarluta ilisaareernikoq naammassereersoq, kisiat sunaaffa suli toqusut inaaniitoq, Ungaaq Lundblad oqarpoq.
Qanoq taama pisoqarsinnaanersoq ilaqutaasut paasisinnaanngikkat
Ungaaq Lundbladip toqusoq ungasissukkut ilaqutaraa. Angut 60-it 70-illu akornanni ukioqarluni ajunaarnikkut pinnani toquvoq.
Taassuma ilisaasimannginnera qaammatit marluk affaatalu qaangiunnerani paasineqarpoq. Tassanimi Nanortalimmi utoqqaat illuanni najugaqartumik ilisisoqartussanngormat angut suli toqusut inaanniittoq paasineqarpoq.
Toqusup ilaqutaasa illerfiup matunnginnerani matunngilaat.
Ilaqutaasut sooq kukkusoqarsinnaanera paasisinnaanngilaat.
- Ingasagaara akisussaaffik taamak angitigisoq kukkusoqarsimammat, Toqusoqarsimanngikkaluarpammi taava paasineqarsimanngikkaluarpa sivisunerusumik? soorlu taamak eqqarsarnarluni, Ungaaq Lundblad oqarpoq.
AAMMA ATUARUK Illerfik imaqanngitsoq ilineqartoq: Alianartumik kukkusoqarpoq
Oqartussat pingasut akornanni kukkusoqarsimavoq. Tamanna Kommune Kujallermi teknikkeqarnermut avatangiisinullu ingerlatsivimmi pisortap, Mike Kristiansenip knr.gl-imut ataasinngormat oqaatigaa.
Oqartussammi pingasut ilisisoqarnissaanut isumaginnittuusarput. Tassa kommuni, peqqinnissaqarfik oqaluffiullu allaffia.
Toqusoqaraangat toqusup timaa nakorsamit misissorneqartarpoq. Nakorsap toqussutaasoq misissortarpaa, tamatuma kingorna toqusup allagartaa illoqarfiusumi oqaluffiup allaffianut tunniunneqartarpoq.
Oqaluffiup allaffiata toqusup allagartaa tigugaangamiuk oqartussat allat toqusoqarneranik nalunaarfigisarpai. Taakku tassaasinnaapput politiit kommuniluunniit.
Iluamik ilisisoqannginnera ippingianartoq
Toqusup timaa toqusut inaanniittarpoq. Kommunilli teknikkeqarnermut ingerlatsiviata toqusup iliveqarfiliaanneqarnissaa isumagisarpaa.
Tassanilu peqqinnissaqarfiup kommunillu sulisuisa akornanni attaveqatigiinnermi ajutoortoqarsimavoq.
Kommune Kujallermi ingerlatsivimmi pisortap pisoq ajuusaarutigalugu ataasinngormat oqaatigaa, tamannalu ” alianartumik kukkusoqarsimaneratut taamaattoqaqqissanngitsutullu oqaatigalugu”.
Illerfiup imaqanngitsut nunamut matoorunneqarneranit qaammatit marluk affaata kinguneratigut angut ilineqarpoq.
- Soorunami eqqissiallannarpoq iliveqarfimmut ilineqarmat taamatut, naak oqaluffikkuungikkaluartoq, toqusut inaaniit toqqaannaq iliveqarfiliaanneqarpoq, taanna ippinnartortaqalaaraluarpoq, kisiat naammagiinartariaqarparput, Ungaaq Lundblad oqarpoq.
