'Toqusortagut pillugit qanorsuaq iliuuseqarsinnaasarpugut'
Atuagaq taaguuteqarpoq "Vi går gerne langt for vore døde - Kirkegårde og landskaber i Grønland", kalaallisut ima nutserneqarsinnaasoq: "Toqusortagut pillugit qanorsuaq iliuuseqarsinnaasarpugut - Kalaallit Nunaanni iliveqarfiit nunalu", taannalu Lone van Deursimit atuakkiarineqarpoq.
Lone Deurs Qaanaamiit Nanortalik tikillugu iliveqarfiit pillugit paasisassarsiorsimavoq. Nammineq misigisai assilisaalu atuakkiamini oqaluttuarai.
Iliveqarfik ataaseq avammut imaannarsuarmut nunaqarfimmullu, piniartuunerusunik inulimmut isikkiveqartoq takuniareerlugu Lone van Deurs Nunatsinni iliveqarfinnik soqutiginnilerpoq.
"Iliveqarfiup inissisimanerata sumik kusanartumik pisoqarnissaanik eqqarsalersippaa, soorlu iliveqarfiup isikkivilimmut inissinneqarnissaa kissaatigineqarsimasoq", atuakkanik naqititerisitsisarfiup Vandkunstenip pisortaa, Søren Møller Christensen, ilaatigut allappoq.
Atuagaq iliveqarfinnut tunngaannanngilaq aammali Nunatsinni kulturerput pillugu allaaserisaalluni.
Atuagaq Nunatsini sapaatit akunneri marlussuit qaangiuppata tunisaalissasoq, Nuummi atuagaarniarfimmit Atuagkanit oqaatigineqarpoq.