Toqusoqareersoq oqallisilerput
- Inuiaqatigiinni atornerluinerni, aallarniutaasartut ajornannginnerpaat ilaat tassaavoq naamaartarneq. Naamaarneq annerusumik aningaasartuutaaneq ajorpoq, isertorlunilu atorneqarsinnaalluni, taamaammat tamanna oqaluuserineqarluartariaqarpoq, Qaqortumi atuakkanik atorniartarfimmi oqallititseqataasussaq Kelly Berthelsen taama oqarpoq.
Unnugu oqallititsinissaq, misigissutsinik sakkortusinnaasunik paquminartunillu oqalliffiussaaq. Oqallinnermi naamaartarneq ikiaroornartunik imigassamillu atuiliaartarneq oqallisigineqassapput, qanorlu tamakku pinaveersaartinneqarsinnaannersut aamma oqaluuserineqassalluni.
Oqallititsinissamut peqqutaasunut ilaavoq, aasaq naamaartoqarneratigut Qaqortumi toqusoqarnera. Taamaammat piffissanngorsorineqarpoq, paquminartut oqaluuserineqalernissaat.
- Siunertaavoq innuttaasut akornanni ajornartorsiutigineqartut oqallisigineqarnernerulernissaat, tassa innuttaasut akornganni paqumisugani oqallittoqalernissaa, Kelly Berthelsen oqarpoq.
Gabriella Gabrielsenip 31-inik ukiullip, 18-inik ukioqartillutik qatanngutinilu naamaartillutik, qatanngunni annaavaa. Erneralu aamma aasaq kammalaatinilu naamaartut paasineqarpoq naamaaqataalu tassanngaanaq uppippoq toqullunilu.
Maannalu Qaqortumi oqallititsisoqarnissaa nukittuallaatigeqaa.
- Torraqaaq, oqaannassaanga kiisami tassa kisimiittutut misigiunnaarpunga. Misigisimavunga, kiisami tassa tasiugassanillunga, Gabriella Gabrielsen oqarpoq.
Gabriella Gabrielsen isumaqarpoq una oqallinneq ingerlajuartariaqartoq qaqugukkulluuniimmi alianarluinnartumik toqukkut qimaguttoqaqqissinnaammat.
- Uanga nammineerlunga oqassuunga pingaaruteqarluinnartoq pinaveersaartitsinissaq, tassami aqagu aqaguaguluuniit alianartumik pisoqaqqissinnaavoq. Taamatut pisoqannginnerani suliniutinik aallartitsisoqarnissaa neriuutigeqaara, Gabriella Gabrielsen oqarpoq.
