Unnerluussisoq, Marutha Thayapharan, eqqartuussummik naammagisimaarinnippoq.Assi: KNR

Toqunikumik agguineq pillugu suliaq naammassivoq - immiussalli saqqummiunneqarnera misissorneqassaaq

Kalaallit Nunaanni inuarnerit peqqarniinnersaasa ilaat pillugu suliaq ippassaq naammassivoq.

Inuup timaanik Ilulissani agguisimanermut eqqartuussivimmi suliaq ippassaq naammassivoq. 28-nik ukiulik, Tittus Hansen, piffissami aalajangingaanngitsumi immikkut paarisassanngorlugu eqqartuunneqarpoq.

Unnerluussisussaatitaasuneersup, Marutha Thayapharanip eqqartuussut taannarpiaq piumasarinikuuaa.

- Naammagisimaartorujussuuara, taanna KNR-mut eqqartuussinerup kingorna oqarpoq.

Eleonora Steenholdt Mørch Eleonora Steenholdt Mørch

- Eqqartuussiviup unnerluussisussaatitaasut Tittus Hansenip toqutsisimanera, inuullu toqusimasup timaanik assuarnartumik ikkatilliisimanera timaatalu ilaanik taassuma kingorna agguisimaneranik tunngavilersuutaat malippaa.

AAMMA ATUARUK 28-nik ukiulik piffissami killiligaanngitsumi isumagisassanngortinneqartoq

Inuarneq peqqarniillunilu naakkitsaatuusoq unnerluussisussaatitaasuneersoq aamma oqarpoq. Suliarlu maanna naammassimmat qanigisaasut sinnerlugit oqiliallaatigaa.

Illersuisorli, Finn Meinel taama naammagisimaarinnitsiginngilaq.

-Tassa taamaappoq, taanna KNR-mut eqqartuussinerup kingorna oqarpoq.

Nassueriasaartoq

Eqqartuussivimmi suliap ippassaq suliarineqarnerani isummamik allannguisoqariasaarpoq. Tittus Hansen toqutsisimasutut inuullu toqusimasup timaanik assuarnartumik ikkatilliisimasutut unnerluutigineqarnerminut eqqartuussivimmi suliaqarnermi ulluni siullerni marlunni pinngitsuuneraqqaaraluarpoq. Taamali isumaqarnini ippassaq mumippaa, tassalu inuiarsimanini inuullu timaanik agguisimanini nassuerutigalugu.

Ilulissani toqutsillunilu agguisoqarnera

 

28-nik ukiulik, Tittus Hansen, inummik toqutsisutut inuullu toqunikup timaanik assuarnartumik ikkatilliisimasutut ippassaq eqqartuunneqarpoq.

 

Taanna aamma oqaqqaarani bilimik atuisimasutut bilimillu ingerlatitsisinnaanermut allagartaqarani 2017-mi juunip 12-ani bilersimasutut unnerluutigineqarpoq.

 

Taanna bilimik aallarussisimasutut eqqartuunneqarpoq allagartaqaranili bilersimanerarneqarnerminut pinngitsuutinneqarpoq.

Taanna aamma Ilulissani 2020-mi februaarip 13-anni nakuusersimasutut aammalu pineqaatissinneqarsimasunut Nuummi inissiissarfimmi 2022-mi januaarip 7-ani nakuusersimasutut unnerluutigineqarpoq. 

 

Ilulissani pisumut pinngitsuutitaavoq Nuummilu pisumut ilaannakortumik pisuutinneqarpoq.


Toqutaasumut qanigisaasunut katillugit 300.000 koruuninik taarsissaaq.  

- Pisut ilaatigut allanngorsinnaasarput. Eqqartuussutip taamak innissaa naatsorsuutaareerpoq, Finn Meinel oqarpoq.

- Taama ittunik pinerluttoqartarneranik qaqutigorujussuaq takusarpugut. Una suliaq imaannaanngitsorujussuuvoq.

AAMMA ATUARUK 28-nik ukiullip inuarsimanini agguisimaninilu nassuerutigigaa

Unnerluussisussaatitaasup oqaloqatigiinneq immiunneqarsimasoq eqqartuussivimmi uppernarsaatitut tusarnaartippaa. Taamalu pisoqareertoq unnerluutigineqartup inuarsimanini inuullu timaanik assuarnartumik ikkatilliisimanini nassuerutigeriasaarpaa.

Siammarterneqartoq

Oqarasuaatikkut oqaloqatigiinneq taanna maanna eqqartuunneqarsimalertup pineqaatissinneqarsimasut Nuummi inissiisarfianni tigummigallarneqarnerani immiussaavoq.

Eqqartuunneqartup angutit allat marluk oqaloqatigiinnermi tassani oqaloqatigai. Tassanilu eqqartuunneqartup qanoq iliorsimanini oqaluttuaraa. Eqqartuunneqartoq ilaatigut oqarpoq, angut siorna 24-nik ukiulik, toqussimallugu timaalu aggoriarlugu eqqaaveqarfinnut assigiinngitsunut igissimallugu.

Angutit marluk allat kikkuuneri saqqummiunneqanngillat.

Immiussaq taanna inoqatinut attaveqaatitigut marlunngornermi unnukkut ingerlaartinneqaleriasaarpoq. Tamanna qanoq pisimanersoq, qanoq sivisutigisumik tusarnaarneqarsinnaasimanersoq unnerluussisussaatitaasuneersup, Marutha Thayapharanip naluaa.

- Qanoq ililluni kikkut tamarmik tusarnaarsinnaasaannut ilineqarsimanersoq maanna oqaatigisinnaanngilara. Politiit suliamik aallartitsisut suliarlu paasiniarneqassasoq oqaatigisinnaavara, taanna oqarpoq.

Tittus Hansenip piffissami aalajangingaanngitsumi immikkut paarisassanngorluni eqqartuunneqarnini akueraa. Tassalu suliaq Nunatta Eqqartuussisuuneqarfianut suliareqqitassanngortinneqanngilaq.

AAMMA ATUARUK Dag 2 i drabssag: Vidne drak med tiltalte og offer få timer før drab

Eqqartuussutip ippassaq saqqummiunneqannginnerani unnerluutigineqartup eqqarsartaasaata misissorneqarnera inuttullu qanoq ittuunera eqqartuussivimmi atuarneqarpoq.

Misissuineq naapertorlugu angut tarnimigut napparsimanngilaq – aamma piffissami pinerluffiusumi. Tittus Hansenili inunnut allanut ulorianarsinnaasutut nalilerneqarpoq. Attaveqarniarnermigut ajornartorsiuteqangaatsiartoq. Eqqarsaqqaarani iliortartoq. Iliuutsiminik paasinnittuaannanngitsoq. Imigassamik hashimillu atornerluisoq.

Forsvarer Finn Meinel Forsvarer Finn Meinel

- Sullitama eqqartuussut akueraa. Nassuereernikuugami taamaaliorpoq. Nakorsat eqqartuussinermi siunersiortagaasartut oqaaseqaataat taamaattuutillugit piffissami killilingaanngitsumi pineqaatissinneqarneranit allatut pineqarnissaa maanna ajornakusoorpoq, illersuisoq, Finn Meinel oqarpoq, eqqartuunneqartullu eqqarsartaasaata misissorneqarnera innersuussutigalugu.

 

Pisoq naatsumik: 

  • Ilulissani eqqakkat ikuallatassat akornanni inuup niuanik siorna arfininngornermi oktobarip aappaani nassaartoqarpoq.
  • Inuup niaqua 58-eriarlugu kapineqarsimasoq ataasinngornermi oktobarip ulluisa sisamaani nassaarineqarpoq. Kapuineq toqunnginnerata toqoreerneratalu kingorna tamanna pisimasoq misissuinerup kingusinnerusukkut takutippaa.
  • Nassaartoqarnera kingorna ullut ingerlaneranni inuup timaata ilaanik allanik aamma nassaartoqarpoq, taakkuli ilaatigut ikuallassimapput.
  • Unnerluutigineqartoq najukkamini siorna oktobarip ulluisa arfineq-pingajuanni tallimanngornermi tigusarineqarpoq. Taannalu taamanili tigummigallarneqalerluni manna pinerluuteqarsimasunut Nuummi inissiisarfimmiippoq.

 

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl