Toqungasoq pillugu suli paasissutissiisinnaanngillat
Nuup Nuussuartaani toqungasup timaanik nassaartoqarnerata kingorna angut sapaatip-akunnerini sisamanngulersuni Nuummi politiinit tigummigallagaasoq pillugu politiit suli paasissutissiisinnaanngillat.
Arnap 58-nik ukiullip timaa toqungasoq qaammatingajaap matuma siorna nassaarineqarpoq, tassungalu atatillugu Nunatta Eqqartuussivia angummik tigummigallagassanngortitsivoq.
Maanna sapaatip-akunneri sisamanngulersut politimesteriugallartoq Morten Nielsen angut qanoq pineqaqqissanersoq paasissutisseerusunngilaq.
Arnap 58-inik ukiullip sumik toqquteqarsimanera Danmarkimi toqungasut timaanik misissuisartut suli misissuipput. Misissugassat ilaat suli naammassineqanngimmata politiit misissuinerat ingerlariaqqissinnaanngilaq.
Nuussuarmi toqungasup aappaa Nuummi politiinit toqutsinertut nalilersimagaat radioavisimi siusinnerusukkut oqaluttuaraarput suliarlu toqutsisoqarsimatillugu suleriaaseq atorlugu suliarneqalereerpoq. Suliamut tassunga atatillugu angut arnamik 40-t sinnerlugit ukiulimmik toqutsisimasutut pasillugu sapaatip-akunnerini sisamani politiinit tigummigallagaavoq. Morten Nielsen naapertorlugu angut arnamit ilisarisimaneqarpoq.
