Toqunartup sunniutai ilisimaneqanngillat
Issittumi uumasut akornanni nanu toqunartoqarnerpaasoq, misissuinerit nutaat takutippaat. Nanu toqunartoqarnerpaalersimavoq, timmissat, aalisakkat imarmiullu miluumasut nannup nerisarilluagai toqunartoqarnerat peqqutaalluni.
Illup iluani atortut PerFlourOctan Sulfat-imik taaneqartartumik akoruutissartallit nalinginnaalluinnartut, soorlu eqqiaanermut atortut allallu nannut toqunartoqalersimanerannut ilaatigut peqqutaatinneqarput. Sulili nalunarpoq, akoorutissat inunnut, uumasunut avatangiisinullu qanoq sunniuteqartarnersut. Ukiunili sisamani-tallimani misissuisoqareeraluartoq, inernerit ilisimassallugit pingaaruteqartinneqarput.
- Akoorutissat uumasumut pigaangamik arrortikkuminaatsorujussuanngortarput, sunniutigisinnaasaalli misissugassanut ilaapput.
Ilisimatooq Rossana Bossi DR-imut taama oqarpoq.
Nunatsinni nerisaqarnermut siunnersuisoqatigiinni ilaasortaq Gert Mulvad oqarpoq, inuit miluumasut neqaannik nerigaangamik sunnerneqartarnerat pillugu paasissutissaateqartoqanngitsoq, taakkulu pigilertinnagit iliuusissanik siunnersuuteqarsinnaanatik.