Toqunartoq Kalaallit Nunaanni misilittagaqarfiulluarpoq

Assoortuussut unaanerusimavoq:

- Akuutissaq toqunartortalik cyanid 1 milegram inuup toqussutigisinnaavaa aamma avatangiisinik mingutitsisinnaavoq.

- Naamik, kuultimik piiaanermi cyanid atorlugu pitsassuuvoq, aamma avatangiisinik mingutitsinissaa aarleqqutissaasariaqanngilaq.

Tassa oqaatsit taakku aasortuunnermi ilaatigut patsisigineqartut.

Assutuuttut tassaapput Angel Mining illuatungeralugit ICC aamma avatangiisit pillugit illersuiniaqatigiit Avataq. Assortuunneq aallartippoq, Nalunami kuultisiornermi cyanid atorlugu piiaaniarnerminni, Angel Miningip Namminersorlutik Oqartussanut akuersissummik piniarlutik aalajangeeqqusereerneranni.

Danmarkimi avatangiisit pillugit misissueqqaartarfimmi ilisimatuutut misissuisartoq, seniorforsker Poul Johansen, cyanidip atorneqarneranut ilisimasaqarluartuuvoq. Taassuma naqissuserpaa, imermut literimut 0,5 milligram cyanid sinnerlugu Kalaallit Nunaanni suliffeqarfinnit atorneqarnissaa inerteqqutaasoq.

- Cyanid annertuallaaq atoraanni avatangiisit mingutsinneqarsinnaapput, 0,5 milligrammiinnarli avatangiisinut akulerukkaangami avatangiisini uumasunut mingutsitsineq ajorpoq, Poul Johansen oqarpoq, erseqqissarpaalu toqunartup atorneqartup sinnera avatangiisiniitilluni imermit arrortinneqartarmat. Assersuutitut taavaa, ukiut 20-t matuma siorna Maamoriliup matunerata kingorna, zink aamma aqerloq mingutserutaangaatsiarsimammata, taakkuli maanna ajornartorsiutaajunnaarsimasut.

- Cyanidip atorneqartup sinnera Maamorilimmi kangerluup imaartaanut akulerunneqarsimavoq. Cyanid-illu ulorianaatinngorsimaneranik misissuinitsinni paasivarput, cyanid ulorianaataanani arrortinneqarsimasoq.

Poul Johansenip aamma erseqqissarpaa Maamorilimmi paasisat Nalunami kuultisiornermi paasiniaanermut assersuunneqarsinnaanngitsut, pissutigalugu Nalunami imeq tarajoqanngitsoq atorlugu cyanid arrortinneqartartussaammat.