Nunani EU-mut ilaasortaasuni gassimik toqunartortalimmik CO2-mik silaannarmut aniatitsinerup annikillisinneqarnissaanik EU-p piumasaqaataa sakkortunerusariaqarpoq, aalajangersagassatut siunnersuummut taama oqaasertalimmut, EU-mi ilaasortat inatsisartuini amerlanerussuteqartut ippassaq pingasunngornermi akuersipput.
Aalajangersagaq sukannersoq nutaarlu malillugu nunat EU-mut ilaasortaasut silaannarmut CO2-mik aniatitsinertik ukioq 2020-iutinnagu 30 procentimik annikillisereersimasussaassavaat.
Aalajangersagaq taanna malillugu ukioq 2050-itinnagu nunat EU-mut ilaasortaasut gassinik silaannarmut mingutsitsisunik aniatitsinertik 80 procentimik aamma annikillisimasussaavaat.
CO2-mik silaannarmut aniatitsinerup annikillisinneqarnissaa aallaqqaammut aalajangernermi 20 procentiinnaagaluarpoq, massakkulli anguniagaq tassa annertusivoq.
EU-mi ilaasortat inatsisartuini akuersissutigineqartoq nunat EU-mut ilaasortaasut qullersaasa EU-mi marsimi ataatsimeersualerunik oqaluuserissavaat.