Toqumut eqqartuussineq kinguartinneqarpoq
29-inik ukiullip Habibollah Latifi civilingeniørimut ilinniagaqartup Kurderit partiiannut ilaasortatut pasisaalluni toqumut eqqartuussalluni parnaarunneqarpoq. Toqutaanissaanut akerliusut hundredenik amerlassuseqartut 29-nik ukiullip paarnaarussaaffigisaata silataani akerliussutismik takutitsipput, tuluit aviisiat The Guardian taamatut allaaserisarpoq.
29-inik ukiulik partiimut Kurdish Indenpent Life-mut ilaasortaasutut pasisaavoq. Taannalu Iranimit naalakkersuisunut akerliusutut Iranimi aqutsisunit isigineqarpoq.
Latifi partiimut tassunga ilaasortaanngitsoq Latifip ilaaqutaasa oqaatigaat, pasilliutigineqartullu tunngaveqanngitsut oqaatigalugu.
- Isumaqanngilluinnarpoq. Ilinniartutut politikkikkut suliaqarsimammat naalakkersuisut puffassimaarutigaat, partimullu tassunga ilaasortaasimanerarlugu toqunniassagamikku, Habibollah Latifip najaa Elahe The Guardianimut oqarpoq.
- Inuiaqatigiinnit nunat tamaneersunit malugineqarnissaa neriuutituaraarput. Aniga sussuteqanngitsoq nunarsuarmi juullisiuleruttortut toqutaannginnissaa anguniarlugu ikiorsiuk, najaa oqarpoq.
Amnesty International paarnaarussiviup silataani najuuttunut ilaavoq, peqatigiiffimmiillu inuit pisinnaatitaaffiinik sulissutiginnittumit oqaaseqartartoq The Guardianimut neriulluarluni oqarpoq:
- Tusaaneqarsimarpasippugut, kinguartitsinerli nangaanartoqarpoq, ilaasortattalu illersuisuttalu naapertuilluarnermik pisoqarnissaanik piumasaqarnerat unitseqqunngilluinnarparput, Drewery Dyke oqarpoq.
Kurdereq toqumut pillagassanngortinneqartoq ukiuni pingasuni paarnaarussaaqqasimavoq, Amnesty Internationalilu naapertorlugu matoqqasumik eqqartuussineq ingerlanneqarsimavoq, Habibollah Latifilu eqqartuussinerup nalaani illersuisoqarsimanani.
Inuit pisinnaatitaaffiinik eqqartuussisuserisoq Peter Tatchell oqarpoq maanna pisoq ajoraluartumik qaqutigoortuunngitsoq.
- Kurderinik ikinnerussuteqartunik eqqissisimasumik peqqarniisaaratik inuttut pisinnaatitaaffinnik sulissutiginnittunik tunngaveqarani Irani eqqartuussiuartarsimavoq, The Guardianimut oqarpoq.
Habibollah Latifi maanna eqqartuussivimmi illersuisoqalersimavoq, piffissarlu kingullerpaaq atorlugu suliaq Latifimut tunngasoq naleqquttunik tunngavilimmik eqqartuussivikkooqqinnissaa sulissutigaat.
