Toqumut eqqartuussaareeraluarlutik aniguipput
Bulgariamiut peqqissaasut tallimat nakorsarlu Palæstinamiu ataaseq Libya-mi ukiut arfineq pingasut parnaarussaareersut iperagaatinneqarput, naak tamarmiullutik toqumut eqqartuussaareeraluarlutik, tassa piaaralutik meeqqanik 400-nik hiv-p uumasuaraanik tunillaasimasutut pisuutitaallutik. Pisimasoq avataaniit eqqumiigineqarpoq.
Peqqissaasut Bulgariamiut napparsimmavimmi suliartorlutik Libyaliarput, tassami Libya-mi peqqissaasut akissarsiarissaarnerummata.
Atugarliortitaanerat aallartippoq 1999-imi tigusarineqarmata, meeqqanik 400-t sinneqartunik piaaralutik hiv-p uumasuaraanik tunillaasimasutut unnerluutigineqarlutik. Taamanili eqqartuussisutigut suliassaq angisooq aallartinneqarpoq. Unnerluussineq nunat tamat akornanni quianaannartutut isigineqarpoq unnerluutigineqartullu toqumut eqqartuunneqarput. Taama eqqartuunneqarnerat qanittukkut allanngortinneqarpoq inuunertik naallugu paarnaarussassanngortinneqarlutik. Taama allanngortitsisoqarpoq meeqqat hiv-mik tunillanneqarsimasut angajoqqaavisa toqumut pillagassanngortitsinermik piumasaqarnertik taamaatiinnarmassuk, tassa aningaasarpassuarnik taarsiiffigitinnissartik taarsiullugu piumaneruleramikku.
Aningaasat taarsiiffigitinnernut atorneqartut meeqqamut ataatsimut 5,5 million koruuniupput. Aningaasat aningaasaateqarfimmit pissarsiarineqarsimapput, aningaasaateqarfiulli aningaasat sumit pisimanerai erseqqarluppoq. Aningaasat nunanit assigiinngitsuneersuusinnaapput, aningaasaateqarfinneersuusinnaallutik imaluunniit suliniaqatigiiffinneersuusinnaallutik.
Taamaattorli Bulgaria tigusarineqartut aniguisinnissaannut akiliiumanngittuarsimavoq, tassami akiliigaluarunik peqqissaasut nakorsallu pisuunerisa nassuerutigineqarnerattut isigineqassammat.
Europami nunat meeqqanut aningaasaliinermik saniatigut, napparsimmaviup meeqqat uninngavigisaata eqqiluisaannginnerlu pissutigalugu tunillanneqarfigisimagunagaata nutarterneqarnissaa akuerisimavaat.
