Toqqortikkamik partiinut tapiissuteqartoqalernera Aleqap ilumuunnginnerarpaa
Naalakkersuisut Namminersorlutik Oqartussani siunnersortinik atuinermikkut aningaasat immikkut siunnersortinut atorneqartussat pitsaanerusumik atorsinnaagaluaraat Anda Uldumip siornatigut avammut nalunaarutigereerpaa, milionilikkuutaanillu toqqortikkamik partiinut tapiissutitut taallugu.
Naalakkersuisut siulittaasuata Aleqa Hammondip taamaattoqarnera ilumuunnginnerarpaa. Immikkut siunnersortit partiinut tunngatillugu assigiinngitsutigut ikiuisartussaapput, taama allappoq.
Partiimut attaveqarneq, partiit ataatsimiinnerini peqataaneq aammalu "ataqatigiissaarinerit politikkimut attuumassuteqartut isumagineri aamma Naalakkersuisut partiinit assigiinngitsuneersut naalakkersuisuutitaqartut akornanni ataqatigiissaarineq."
- Apeqqutinni ilaatigut allapputit, kaajallaasitaq aqqutigalugu partiit Naalakkersuisuutitaqartut annertuumik toqqaannanngitsumik taperneqartalernissaat ammaanneqassasoq, immikkullu ittumik siunnersortit partiinut Naalakkersuisuutitaqartunut partii suliassaanik sullisseqataassasut. Taamatut oqarneq kaajallaassitami tunngavissaqanngilaq, Aleqa Hammond Anda Uldumip saassussineranut akissuteqarluni taama allappoq.
