Toqqissisimasumi alliartortoq atuarfimmi angusaqarluartarpoq
Tassa ajortut angajoqqaaniit kingornuttagaanerinik isumaagaluaq atorneqarsinnaanngilaq, Danmarks Pædagogiske Universitetimi professori taama oqarpoq, paasisallu nutaat sukumiinerusumik misissugarinialerlugit.
Innartarfiit aaliangersimasut, piffissaq eqqorlugu angerlarsimareertarnissaq, taquassaliortarnerit, ullaakkorsiortarnerit, ilinniagasserinissamik piumasaqartarnerit.
Tassa tamakkuupput meeqqat atuarfiini atuartut angusaqarniarunik pisariaqartitaat, tassalu angajoqqaat ilinniagarissaartuunerat, suliffigissaartuunerat isertitagissaartuunerallunniit apeqqutaanngilaq.
Atuarfimmi pisortap Jimmy Hymøllerip nunaqarfimmi Itillimi misissuereerluni taama inerniliivoq. Taassuma misissunerata inernera perorsaanermik professorip Peter Allerupip atuareeraalu qallunaaqqat kalaaliaqqallu annerusumik misissuiffiginialerpai.
- Meeqqat atuarfiini atuartut angusaat angajoqqaavisa ilinniagaqarnerinut suliffeqarnerinullu Jimmy Hymøllerip sanillersuukkaangamigit assut puaatsoortarsimavoq. Meeqqalli angerlarsimaffiini qanoq killilersugaatigineri naleqqiussuutileriaramigit meeqqat angajoqqaaminnit killilersugaanerusartut iluatsinnerusartut paasilersimavaa.
Tamanna paasisaq ajunngilluinnartuuvoq, siaruaannissaalu tullinnguutiinnarluni, tassa Kalaallit Nunaannut nunarsuullu sinnerani assingusumik misissuisoqartillugu paasisat atorneqarsinnaalluarput, Peter Allerup oqarpoq.
Paasisat siornatigulli Peter Allerupip pasitsaatereeraluarpai, tassami meeqqat angerlarsimaffimminni atugarisaat apeqqutaanatik meeqqat atuarfimminni angusaqartarneri Kalaallit Nunaanni kisitseqqissaartarfiup saqqummiussaani atuarneqarsinnaareermata.
Atuartummi ilinniagakitsunik akissarsiakitsunillu angajoqqaallip angusarisai meeqqamit ilinniarluarsimasunik isertitakkaanillu angajoqqaalimmit ajornerusanngimmata, ilami allaat pitsaanerusinnaallutik.
Kisitseqqissaartarfiup kisitsisaatai Jimmy Hymøllerip tupaallaatiginngilai, namminerlu Itillimi misissuisimanerisa inerneri Peter Allerupimut takutimmagit, meeqqat angerlarsimaffimminni killilersukkat angusarissaarnerusarnerat paasinarsivoq.
Paasisaq tupaallannarpoq qiimmaallannarlunilu, tassami angerlarsimaffinni killilersuisinnaanerit timikkut atugassarissaartitsiinnarnissamiit ajornannginnerusarmata, Peter Allerup oqarpoq.
- Meeqqat atuarfimmi angusarissaarnerulernissaanut inuit tamarmik sakkussaqalerput. Tassami timikkut atugarisassat annertunermik iliuuseqarfigineqarsinnaanngimmata.
Angajoqqaammi ilinniagaqarneri, suliffeqarneri isertitaqarnerilu imaaliallaannaq allanngortinneqarsinnaanngillat. Meeqqalli killilersorneqarsinnaapput, tassalu inuk kinannguugaluaruni kinarsuugaluaruniluunniit meeqqanut iluaqutaasussamik sakkussaqareerpoq.
Pilersaarutit malillugit nunatsinni meeqqat 3. klassimiit 7. klassimut atuartut 800-t aasarumiit paasisat aallaavigalugit misissuiffigineqalissapput, aappaagulu meeqqat misissugarineqartut 2000-inngussallutik.
