Toqqissinissaq anguniarlugu atuarfik suli matoqqatinneqarallarpoq

Sulisup tarnimikkut qasusooqqasup allakkanik siorasaarinertalinnik Qaqortumi Tasersuup atuarfiani pingasunngormat unnukkut nivinngaassuinerata kingorna, ilinniartitsisut atuartullu ilaasa toqqissisimannginnerat pissutigalugu, atuarfik ullumi tallimanngornermi aamma matoqqasussanngorpoq, ataasinngorpalli ammaqqissalluni
Assi © : Google Streetview
novembarip 13-at 2015 12:05

- Ippassaq ullaakkut atuarfimmut suliartukaallutik isaammata allakkanik naammattuugaqartoqarpoq, nuanninngitsumik siorasaarinertalimmik imalimmik. Taannalu tunngavigalugu qanoq iliuuseqarsinnaanissaq siunertaralugu pisortat suliniuteqapallassimapput, Kommune Kujallermi meeqqanut kulturimullu ingerlatsivimmi pisortaq, Jens Korneliussen oqarpoq.

Aamma atuaruk Tasersuup Atuarfia matugallarpoq

Tamannalu pissutigalugu Tasersuup Atuarfia ippassaq sisamanngornermi matoqqatinneqarpoq. Pisoq maanna aaqqiivigineqareeraluartoq, atuarfik ullumittaaq matoqqatinneqarpoq.

 

Oqimaattoq

Jens Korneliussen nassuiaavoq, allakkanut takunnissimasunut aamma susoqarneranik paasinnissimasunut pisoq oqimaassimanera taama aaqqiinermut pissutaasoq.

- Ilinniartitsisut ilisimanerit ilisimatinneqarnerini aalajangertoqarpoq, toqqissisimanissaq siunertaralugu atuarfiup ippassaq ullup sinnerani matugallarneqarnissaa, taavalu iluatsillugu aamma ullumikkut tallimanngornermi matoqqagallarteriarlugu, ataasinngorpat ammaqqinnissaa siunniunnikuuarput, Jens Korneliussen oqarpoq, ilanngullugulu oqarluni, atuartut sulisullu tarnikkut sunnerneqarsimasut tarnip pissusaanik ilisimasalimmit ikiorneqarsinnaanerannik neqeroorfigineqarsimasut.

Aamma atuaruk Sioorasaarisoqarnera pissutigalugu atuarfik matuneqarallartoq

- Suliniutigeqquarput, ilinniartitsisut immaqalu aamma atuartuni pisariaqartitsisoqassappat, tarnip pissusaanik ilisimasalinnut oqaloqateqartinneqarnissaat siunniupparput. Kisianni ullumikkut matoqqanera pissutigalugu tamakkuninnga ingerlasoqanngilaq, ullulli ingerlanerani uterfigeqqittussaavarput, taannartaa qanoq ingerlateqqissanerlugu, Jens Korneliussen oqarpoq.