Toqoraavittaarnissaq savaatillit oqaluuserissavaat
Siulittaasoq Qanisartuuni savaatilik Niels Lund oqarpoq, savanik toqoraavittaarnissaq nutaamik sammivilerlugu oqaluuserisassani pingaarnernut ilaasoq.
- Periuseq allaalaartoq, tassa piginneqatigiinnikkut periarfissaq nutaat saqqummernikuuvoq, taanna aqqutigalugu nutaamik toqoraaviliorsinnaaneq neriuppugut ukiuni qaninnerpaani periarfissaqalissasoq.
Mannakkut toqoraavik ukiut 50-it sinnerlugit atuutereersimasoq, ukiuni qaninnerni taasertariaqalivissimanera Niels Lundip erseqqissarpaa.
Nukissiuutinik pilersitsinissamik piukkoortarneq taanna aamma arlariarlugu savaatillit oqaluuserisarnikuummassuk apeqqutigineqarpoq nangeqqinneqassanersoq.
- Nammineq uanga taanna oqariartuutissattut sammivara. Nukissiuutinut tunngasoq ukiuni siusinnerusuni sammisarnikuuvarput. Oqariartuutima ilagissavaat, nukissiuutinik ataavartunik piujuartunik savaateqarfinni periarfissanik pitsaanerusunik periarfissinneqartariaqalersut ullumikkut savaateqarfinni aningaasartuutivut annikillisissagutsigit, tamanna pisariaqarluinnalersimammat.
- Eqqarsaatigivarput seqinermut, imermut taavalu anorimut nukissiuutit, taakka tamarmik periarfissaapput sumi inissisimaneq najoqqutaralugu.
Aamma siorna ataatsimeersuarnermi ammaaninni oqariartuutigisimasama ilaat, tassalu aningaaseriviit aqqutigalugit atukkiisarnerit, savaatilinnut aamma ukiuni kingullerni nungukkiartuaarneqarput. Kisianni tamassuma nungukkiartuaarneratigut paasisimavarput, sanaartukkat eqqarsaatigalugit qularnaveequteqarnissaq savaateqarfinni ajornakusoortorujussuusoq.
- Taamaattumik naatsitsivittut suliarisimasavut, siunissami nammineq savaatillit pigisalernissaat, taanna oqariartuutigeqqinniarpara, taannami qularisariaqanngimmat siunissami qularnaveequtigisinnaagipput pigisatut attartorniarnitsinni, tassa qularnaveeqqutissaaleqinerput taamaalillugu qaangersinnassagaluaratsigu, Savaatillit Peqatigiit Suleqatigiissuni ukiuni arlalinngortuni siulittaasoq Niels Lund taama oqarpoq.
