Tony Blairip suliffittaassaa imaannaanavianngilaq
Tony Blair Naalagaaffiit Peqatigiit Kangiani Qiterlermi aallartitaatut suliassaa oqitsuunavianngilaq. Irakimi sorsunneq pissutigalugu nunat Arabiamiut amerlaqisut akerlerisussaavai:
-Pissaanilinnut sisamanut sinniisuunermigut Palæstinamiut naalagaaffiata pilersinnissaanut nunanit tamalaanit tapersersorneqarnissaminut piareersartariaqarpoq, Tony Blair Kangiani Qiterlermi aallartitatut toqqarneqarmat Naalgaaffinni Peqatigiinni arnaq oqaaseqartartuusoq taamatut oqarpoq. Blairip piginnaatitaaffii tassaapput suliassaqarfiit Palæstinamiut naalagaaffiata ilusilersornissaanut atortussat pilersissallugit, kiisalu Palæstinamiut naalagaaffitsik ingerlatissappassuk aningaasanik isumannaassallugit. Tassalu taamaalilluni Israelimiut Palæstinamiullu akornanni isumaqatigiissitsiniartuussanngilaq, tassanimi USA-p nunanut allanut ministeria suli pingaarnerulluni inissisimammat. Taamaattumilliuna taamatut aaqqissuussineq pissutigalugu Kangiani Qiterlermi aallartitap suliani maanaannaq qimakkaa, isumaqarami tamatuma ingerlannissaa ajornarluinnassasoq. Aaqqissuussinerup allanngortinneqarsimannginnera tamanna Kangiani Qiterlermut tunngasunik ilisimatusartup Jakob Feltip takussutissatut pitsaanngitsutut isigaa.
-Tassami 1990-ikkut aallartimmatali Israelip Palæstinallu akornanni eqqissineqarnissaa pillugu suliniutigineqartut takusarsimasakka eqqarsaatigissagaanni pissutsit allannguuteqarpiarsimanngillat, USA naggataatigut nerriviup isuani inissisimasarmat isumaqatigiissutaasinnaasunillu inernilersuisarluni, taamaammat isumaqarpunga tamanna sumilluunniit allannguutaanavianngitsoq, killiliussat taakkuujuartut suli atorneqarmata. Tamatuma saniatigut Tony Blairip toqqarneqarnera nunani Arabiamioqarfiusuni akerlerineqassasoq nalilerneqarpoq. Blairip nammineq nunani USA-p Irakimi sorsunneranut ilannguppaa, siornalu Israelip Hisbollamut sorsunnera tapersersorsimallugu. Arabiamiut isumalluannginnerat Palæstinamiunit Hamasip immikkoortortaaneersunit erseqqissumik oqaatigineqarpoq. Taassuma tungaaniit nutaarsiassanik pitsaasunik ilimasunngilagut, tassami Blair Amerikamiunik illersuiuassammat.
