Tuluit ministeriunerata, Tony Blair-ip, qaqugu siulittaasutut tunuarumaarnerminik parteeqatini nalunaarfiginianngilai. Oqarneratut: Uangaqarasi saperpusi!
-Tunuarnissannik piffissaliissaguma naalakkersuisut pappiaqqatigut suliassaannut kinguarsaataaginnassaaq,
tuluit ministeriunerat, Tony Blair, parteeqatiminit 50-init qaqugu tunuarumaarnissaminik aperineqarami akivoq.
Ministerit marluk sapaatip-akunnerata kingulliup ingerlanerani soraarsitaanerisa, ministerillu sinnerisa akisussaaffinnut allanut inissinneqarnerisa kingunerisaanik, partiimi Labour-imi eqqissiveerunneqarpoq. Parteeqataasa 50-it piumasaraat, Tony Blair maannangaaq tunuarluni Aningaasaqarnermut ministerimit Gordon Brown-imit taarserneqassasoq.
-Oqareerpunga paarlanneqarnissara torersumik ingerlanneqassasoq. Paarlatsissaralu atorfigiligassaanut inissinnginnerani piffissaqartilluarusuppara, Tony Blair oqarpoq.
Tuluit Nunaanni inatsisartunut tulliani qinersineqassaaq ukiut pingasut qaangiuppata, Tony Blair-illu ilimasaarutigaa naalakkersuisut siulittaasuattut sisamassaa qinigaanissi siunniuteqqallugu.
-Partiitta iluani ingasattumik naalakkersuisut siunniussaannik allannguinissamik siunertaqartoqarpoq, paartiittali nutarternissaanut siunniussaqartoqarani.
Siulittaasutut maannangaaq tunuartitaassaguni Labour-imi siunniussatik, suliniutitillu namminneq iluaqutiginagit, illuatungiliuttut iluaqutigiinnassagaat, Tony Blair naggasiivoq.