Tony Blair Københavnimiillatsiarpoq

Tuluit Nunaata ministeriunera Tony Blair ullumi Københavnimiillatsiarpoq. Letlandip illoqarfiisa pingaarnersaani Riga-mi NATO-p qullersaasa ataatsimiinnissaani peqataajartornerminut atatillugu.

Blairip Københavnimiinnermini ataatsimeeqatigai ministeriuneq Anders Fogh Rasmussen aamma Socialdemokratit siulittaasuat Helle Thorning-Schmidt pingaarnertullu oqaluuserineqartut ilagaat Afghanistanimi aamma Irakimi pissutsit.

-Sakkutuuvut piffissami aggersumi suli atorfissaqartinneqassapput, taamaattorli nunap immikkoortuini sisamaasuni nakkutigisatsinni marluk irakimiunut tunniutereerpavut.

Basrami suliavut iluatsissappata, tassani sakkutooqartitsinerput ukiup nutaap aallartinnerani nalilersorsinnaalissavarput, Tony Blair Anders Fogh Rasmussenimik ataatsimeeqateqareerluni oqarpoq.

Tamanna Anders Fogh Rasmussenip isumaqatigaa, oqarlunilu, Irakimi sakkutooqartitsineq allannguuteqassappat, Tuluit Nunaata, Danmarkip USA-llu akornanni qanittumik suleqatigiinnikkut tamanna piumaartoq.

Socialdemokratit siulittaasuat, Helle Thorning-Schmidt, oqarpoq, Afghanistanimut atatillugu isumaqataalluni, tassami tassani ilungersunartunik suliassaqarmat. Aamma oqaatigaara sakkutuut Irakimit erniinnaartumik angerlartittariaqarivut.

Fogh-Rasmussen Blairilu Københavnimi ataatsimeereeramik naalagaaffinni qullersat 24-t NATO-p qullersaasa ataatsimiinnissaannut Letlandimi ingerlanneqartussamut peqataajartorput. Afghanistanimi pissutsit pingaarnertut tassani aamma oqaluuserineqarput.

Afghanistan tassaavoq NATO-p suliniuteqarfigisaasa pingaarnersaat.

2001-imut naleqqiullugu pissutsit pitsaanerulaalernikuupput, kisianni isumannaatsuunissaq nunap ilaani ajorluinnarpoq, ilaatigullu ajorsiartorluni.

Akerliuniat, talebanit, Al-Qaidap peqqarniisaarniartartui, ikiaroornartunik tuniniaasartut assigisaalu, soorlu nunap kujasinnerusuani sukakkaluttuinnarput. Tassa massakkut pissutsit ajorsiartuinnartutut oqaatigineqarsinnaapput.