Tommy Marøp sila pillugu ilisimatusarfissaq iluaqutigineqassanerarpaa

Sila pillugu ilisimatusarfissaq Tommy Marøp Kalaallit Nunaanniinnaanngitsoq nunarsuarmioqatitsinnit iluaqutigineqassasoq ilimagaa.

Danmarkimi ilisimatusarnermut Ministeri Helge Sander, Sila pillugu ilisimatusarfissamut 75 millionit koruuninik aningaasaliisoqassasoq oqarpoq. Akerlianilli Kalaallit Nunaat qanoq aningaasaliissanersoq suli ilisimaneqanngilaq,

- Soorunami Assigiinngitsorpassuartigut iluaqutigisussaavaat, kisianni nunantta kisimi iluaqutiginavianngilaa, nunarsuarmioqatigiit aamma qularnanngilaq iluaqutigiumaaraat, Kulturemut Ilinniartitaanermut, Ilisimatusarnermut, Ilaqutariinnermullu Naalakkersuisoq Tommy Marø oqarpoq.

Ulluni makkunani silap pissusaata allanngornera pillugu ilisimatusartut Kangerlussuaq aallaavigalugu paasisanik katersipput. paasisallu katersorneqartut Sila pillugu ilisimatusarfeqarlernikkut katersuuffeqalersinnaassapput, tamannalu nunatta iluaqutigisinnaalluarpaa.

Kalaallit Nunaat sila pillugu ilisimatusarfissamut qanoq aningaasaleeqataassanersoq suli ilisimaneqanngilaq.

- Maannakkut atorfilittagut ulapputeqarput, tassa Helge Sanderi kissaateqarnikuugami piffissami qanittumi ataatsimeeqatigiissasugut, Folketingimut una apeqqut suli akuerisassanngorlugu qaqitsinnagu, apeqqutit assigiinngitsut qulaaqqaarusukkamigit, , Tommy Marø oqarpoq.

Sila pillugu ilisimatusarfissap aningaasalerneqarnissaa akuerineqassappat, ukioq 2008-imi pinngortitaleriffik inissisimaffigalugu ammarneqassoq ilimagineqarsinnaavoq.