Tommy Marø tuavisaarpaat

Naalakkersuisunut ilaasortanngorlaaq, Tommy Marø, Naalakkersuisunut Demokraatinullu nassuiaassasoq ullut 14-it matuma siornagut piumaffigineqarpoq.

Sulili taamaaliorsimanngimmat Demokraatit maanna tuavisaaripput.

Naalakkersuisut siulittaasuata, Hans Enoksenip, Tommy Marø decembarimi julefrokosternerup kingorna politiit biiliinik angerlaatsikkusussimaneranut tunngasumik nassuiaaqquaa, tassa Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Tommy Marø, Radioavisimi nassuiaanermini oqarmat, partiit kalerrinneqareersut. Tommy Marø taamani oqarpoq, julefrokostereernerup kingorna Sermitsiami allaaserisaq atuareerlugu, nammineq pineqarnini, Inatsisartuni partiinut tamanut kalerriussimagini.

Demokraatilli saaffigineqarsimannginnerarmata Hans Enoksenip Tommy Marø januaarip 22-ani uppernarsaatissanik tunniusseqquaa, tamanna angalareerpat pissasoq ilimagalugu. Tommy Marø januaarip 25-anili Nuummut uterpoq, tikinneranillu maanna ullut qulit qaangiussimalerput, suli tunniussigani.

Demokraatit allakkanik tuavisaarutitik naalakkersuisut siulittaasoqarfianut nassiuppaat.

Naalakkersuisut pineqartut arlaannaalluunniit oqaaseqartinniaraluaratsigu iluatsitsinngilagut.