Tommy Marø: Pitsanngorsarniarlugu suliniartoqaleruttorpoq

- Soorunami uggorivara Atuakkiorfiup taamatut avammut suaaruteqarnera. Maajip 26-ani nammineerluta Atuakkiorfik ajornartorsiutaat pillugu ataatsimeeqatigaarput taamanikkullu isumaqatigiippugut uagut aamma suleqataassasugut. Atuakkiorfiup siulersuisuisa siulittaasuata ippassaq radioavisimi oqaatigisaa, suliariumannittussarsiuussisarnerup eqquteqqinneqarnissaanik apeqqut uagut soqutigisimavarput aammalu neriorsuutigalugu kingusinnerusukkut uterfigeqqinniarlugu, Tommy Marø nassuiaavoq.

Apeqqut aningaasanut inatsimmut 2009-mut oqaasertaliussat qanoq isillugit aaqqinneqarsinnaanerannut tunngasoq Kultureqarnermut naalakkersuisoqarfimmi maanna eqqartorpaat.

- 2008-mut soorunami iliuuserisinnaasagut killeqarput, kisianni aningaasanut inatsit 2009-mut tunngasoq aallaavigalugu taamaallaat iliuuseqarsinnaavugut, oqarpoq.

Atuakkiorfiup tapersersuinikinneq ilaatigut aamma atuakkiassanik naliliisartoqatigiit inuttalersorneqarsimaneranik pissuteqartippaat.

- Naliliisartut ilanngullugit apeqquserneqarmata uagut naalakkersuisoqarfitsinninngaanniit uparuaat soorunami tusaatissatut tiguarput. Kisianni aamma apeqqusiineq kulturrådip ukiaru aggutsimi ataatsimiinnissaani naliligassatut ilanngunneqassaaq, nassuiaavoq nangillunilu:

- Imaanngilaq uagut atuakkanik saqqummersitsinissamik aningaasanut qinnuteqartunut atatillugu naliliisartut ullumikkut piusut apeqquserniarivut. Kisianniuna nalilersorniaripput Atuakkiorfiup apeqqusiinera tunngavissaqarnersoq. Uani naliliisartut immaqa siammasinnerusinnaanerat takorloorneqarsimassaaq, aamma uani avammut oqariartuutiminni tamanna qiterigunarpaat, Tommy Marø oqarpoq.

Tommy Marø-p ilanngullugu erseqqissaatigaa, atuakkanik saqqummersitsinissanut aningaasat ukiumut agguaattakkat 300.000 koruuninik qaffanneqarnerat meeqqanut kalaallisut atuakkiat amerlineqarnissaanik pissuteqartoq.

Atuakkanik saqqummersussanik naliliisartoqatigiit atorfilittat saniatigut Kalaallit Atuakkiortut aallartitaat kisiisa ilaasortaraat.