Tommy Marø: Børneattestit ukiortaamiit piumasaqaataasalissapput

Meeqqerivinni, atuarfinni timersornermullu tunngasuni sullissilertinnani meeqqanut inuusuttunullu kannguttaatsuliorsimannginnermut uppernarsaateqartalernissamut inatsit ikinnerpaamik ukiuni qulini utaqqineqarsimasoq inatsisartut ukiaru ataatsimiilerpata saqqummiunneqassaaq. Akisussaaffiup naalakkersuisoqarfimmi sorlermiinnissaata nalornissutaasimanera børneattesteqartalernissamut inatsisiliornissamut pilaarutaasimasoq, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Tommy Marø oqarpoq.

- Uagut aatsaat piffissap sivisoorsuunngitsup iluani suliaq tigusimavarput siusinnerusukkut aamma ilaqutariinnermut naalakkersuisoqarfimmi inatsisissap suliarineqarnissaa siullermik tunniunneqarsimagaluarmat. Massakkut inatsisissaq suliarineqarpoq ukiamullu inatsisartunngortussat taamaasillugu isummerfigisussaavaat, Tommy Marø nassuiaavoq.

Erseqqissaatigaa sumiluunniit meeqqerivinni, atuarfinni imaluunniit timersornermik ingerlataqarfiusuni atorfinittussaq pillugu sulisitsisup paasiniaasinnaanera ullumikkut periarfissaareersoq.

Sulisitsisoq atorfinittussaq pillugu ukiukitsunut kannguttaatsuliorsimanermut uppernarsaammik piniarsinnaavoq.

Pinaveersaartitsinermik suliaqarfik “Paarisa” suli inatsisiliortoqarsimannginneranik qanittukkut uparuaavoq, ukiuni qulini susoqarsimannginneraalluni. Neriuutissaqalerpat? Tommy Marø aperaarput.

- Neriuutissaqaannarnatik, naatsorsuutigissavaat ukiamut inatsisartut ataatsimiinneranni inatsisissap naammassillugu suliarineqarnissaa, neriorsuivoq.

Naalakkersuisoqarfiup ukiuni qulini inatsisissap utaqqineqarnera sivisuallaarsorinerpaa?

- Soorunami taamatut oqartoqarsinnaavoq, kisianni nalornisoqarsimappat soorunami aamma paasinarpoq. Kisianni naammassisussanngomar pingaarnerpaavoq, eqqissisaavoq.

Naalakkersuisoqarfiup ilimagaa inatsisissaq ukiaru inatsisartuni akuerineqarsinnaajumaartoq.

- Apeqqutaassaarli qaqugu inatsisartut ataatsimiissanersut. Januaari 2010-mi atuutilernissaa naatsorsuutigaarput, Tommy Marø erseqqissaavoq.

Tommy Marø aamma oqarpoq, meeqqanut inuusuttunullu tunngasuni atorfinitsitsisartuusut, pineqaatissinneqarsimanermut uppernarsaammik qinnuteqartut takutitsinissaannik maanna piumasaqarsinnaareermata, straffeattestimik taasartakkamik. Uanili piumasarineqartalersussaq tassaavoq børneattesti – meeqqanut inuusuttunullu tunngatillugu pineqaatissinneqarsimanermut pinngitsoorani uppernarsaataasalersussaq.