Tommy Marø naalakkersuisutut sapiutinnginnerarpoq

Inatsisartut upernarnerani ataatsimiilernerat eqqorlugu naalakkersuisut ataatsimik taarserneqarnerat suliassaqarfiillu allanngortiternerat inatsisartuni ilaasortat 18-nit amerlanerussuteqarlutik ullumi akueraat.

Ilaqutariissutsimut inatsisinillu atortitsinermut naalakkersuisutut ivertinneqaqqammerpoq Tommy Marø, naalakkersuisutullu suliassaminut sapiutinnginnerarpoq, politikkimik suliani misilittagaqarfigilluareernerarlugit.

- Politikkimik suliaqarniarlunga aalajangernikuuvunga, Tommy Marø oqarpoq.

Tommy Marø 1997-imili politikkimik suliaqalerpoq kommunalbestyrelsemut iserami. 1999-mit 2002-p tungaanut inatsisartunut qinigaavoq. Tamatuma kingorna Qaqortumi borgmesterinngorpoq. Tommy Marø nammineq isumaqarpoq politikkikkut sukkasuumik ineriartorsimalluni.

- Naalakkersuisutut sulinissaq unamminartoq piareersimaffigaara. Tommy Marø erseqqissaavoq.

Inunnik isumaginninnermut suliat kommuninut attuumaqimmata naalakkersuisutut ingilluni suliaq maanna nanginniarpaa, aalajangigassallu isumaqatigiinniarnikkut isumaqatigiissutaasassasut neriorsuivoq.