Tobias ukiuni 62-ini piniartuusoq takornarialerisutut nersornaaserneqarpoq

Greenland Tourism Award nunatsinni takornariaqarnermik ingerlatsisunik ukiut tamaasa nersornaasiisarput.

Nersornaat Visit Greenlandip Air Greenlandillu suleqatigiillutik tunniuttarpaat.

Nersornaat taanna ukioq manna Tasiilami takornariaqarnermik ingerlatsisumut Sermilik Adventuresimut tunniunneqarpoq.

Tasiilami takornarianik angallassivik, Sermilik adventures piniartumit Tobias Ignatiussenimit, peqqissaasumillu Line Kristiansenimit pigineqarlunilu ingerlanneqarpoq.

Taanna 2019-imi pilersinneqarpoq. Pilersinneqaannartorli unammillertartumik pisoqarpoq:

- Sermilik adventuresip 2019-imi pilersinnerata kingunitsianngua corona takkuppoq. Taamaammat aallarteqqaaratta takornariaqanngingajavippoq, taamanilu suliagut allamut sangutilaartariaqarpagut, Tobias Ignatiussen oqarpoq.

Piniartup peqqissaasullu takornarialerisunngorniarnertik qanoruna ataatsimoorfigileraat?

Tobias Ignatiussenip Line Kristiansenilu suleqatigiilernertik ima oqaluttuaraa:

- Linep takornarialerinermut tunngasumik namminersorluni aallartikkusunnerminik oqaluttuuppaanga. Taava oqarfigaara soormi aallarteqatigiikkutta? Uanga angallassinissamut angallammik akuerisamik peqarpunga, taava tassa taamaalilluta Sermilik adventures aallartipparput.

Coronalli akimmisaartitsinera peqqutaalluni suliaat allatut aallartipput.

Kommuneqarfik Sermersuup Tasiilami immikkoortortaqarfiani, meeqqanut inuusuttunullu inuuniarnermikkut ajornartorsiuteqartunik asimut angallasisalerput.

AAMMA ATUARUK Nivé Heilmann aamma Frank Larsen 2021-mi takornariaqarnermut nersornaaserneqarput

Ukiorli manna aatsaat takornarianik angallassineq tamakkiisoq ingerlatilersimagitsik piginneqataasoq KNR-imut oqaluttuarpoq.

- Upernaaq franskit takornariartaataat tikimmat illoqarfimmiut peqatigalugit taakku sullippagut. Qimussimik, qamuteralannik angallallugit, aalisariartillugit misigisaqartippagut.

- Ukiakkut qamuteralannik Tasiilamiit Tiilerilaamukartarpugut, taava Tiilerilaamiit umiatsiamik angallassisarluta.

Tobias Ignatiussen novembarimi 62-inik ukioqalissaaq. Taanna inuunini tamaat piniartuuvoq.

Assi © : Sermilik Adventures

Tobias Ignatiussen, Tasiilaq 

Takornarialerisutulli nersorneqarnissani takorloorsimanngisaannaraluarpaa:

- Tuppallernartorujussuuvoq, inuuninni taama misigisaqarnissara ilimaginnginnakku. Aamma nersornaaserneqarnerput eqqarsaatiginikuunngilaraluunniit, Tobias Ignatiussen oqarpoq.

Taassuma piniartup silarsuaaniit takornarialerisut silarsuaannut nuukkiartornini ilaatigut ima oqaasertalerpaa:

- Ullumikkut nunarsuarmi aningaasaq naalagavoq, taannalu aamma uanga atorfissaqartikkakku isumaqatigiissutit allanngortinngivillugit takornarialerisarpunga piniarneq kingulliullugu.  

- Inuusuttuullungali qilalugarniarneq nuannarisorujussuuara, kisianni aasaq manna qilalugarnianngitsoorpunga, takornarianik sullissiniarlunga isumaqatigiissuteqarnikuugama. Qangatut eqqissillunga pinialussaarnikuuvunga, tuaviinnaq pisarerusutakka piniariapallattarpakka.

Taamaakkaluartorli ullumikkut killiffini nuannareqaa:

- Suliakka nuannareqaakka, aatsaat taama sulianik nuannertigisunik. Uggornarporluunniit 60-it sinnerlugit ukioqalereernera, suli ukiorpassuarni suliakka aallukkusukkaluarakkit.

Tobias Ignatiussenip Line Kristiansenilu Sermilik Adventures 2019-imi pilersinnialeramikku angallassiviginerpaasartagartik atsiuppaat.

Tassalu Tiilerilaap kangerlua “Tsermili” – Sermilik.

Nersornaat siuarsaanermut atorneqassasoq

Line Kristiansen 2005-imi Tasiilap napparsimmaviani peqqissaasutut suliartorluni tikippoq.

Tunumili pinngortitarsuaq Linemik tiguaavoq.

- Peqqissaasutut sulinera nuannareqaara, kisianni ukiut ingerlaneranni napparsimmavik qimakkusulerpara pinngortitarlu qanillerusulerpara inunnillu sullissivigerusullugu, Line Kristiansen oqarpoq.

AAMMA ATUARUK Arctic Dream ukiormanna nersornaaserneqartoq

- Marluulluta namminersortunngorusunnikuuvugut, aapparma allaffissornermut ikiortissaqarnissani pisariaqartippaa. Uangalu tunumi angallavinnut ilisimasaqarluartumik pisariaqartitsillunga, taamaalilluta suleqatigiilerpugut.

Sermilik Adventuresip nersorneqarnerata ineriartuutiginissaa piginnittut oqariartuutigaat.

- Europamut tuniniaanerput annertusassavarput. Maani takornariartitsivigisartakkagut allallu takornariarfigineqarsinnaasut inerisaqqissavagut. Taamaammat nersornaasigaanerput iluaqutigalugu tusaamaneqarnerulernissarput naatsorsuutigaara, taamaalillutalu takornarianik ornigarneqarnerulissalluta, Line Kristiansen oqarpoq.

- Aningaasat aamma takornariartitsinermut tunngasunik ineriartuutaasinnaasunik paasiniaanermi takornariartitsisartunillu allanik naapitsinissamut atorumaarpagut.