TNI pillugu Brancheudvalg akerliliivoq

Tunngaviusumik Ilinniartitaanerup ukiunik marlunnik sivikillineqarnissaanik Nunaqavissut Sulisitsisut Kattuffiata, NUSUKA-p, siunnersuutaa, brancheudvalgep naammaginartinngilluinnarpaa.

Sulilluni sungiusartarneq, ullumikkut sapaatip-akunnerinik 130-inik sivisussusilik, siunissami sapaatip-akunnerinut 20-nut ikilisinneqarnissaa NUSUKA-p siunnersuutigaa.

Ilinniartitaaneq STI-imik taaguteqarallarami ukiuni pingasuni ingerlanneqartarpoq, taamanikkullu ukiuni marlunni sungiusaatigalugu sulisoqareeraangat ilinniarneq naammassineqartarpoq. Taamanikkumullu naleqqiullugu Tunngaviusumik Ilinniartitaaneq maanna ima pitsaalersimatigaaq, allaat nunani allani ilinniartitaanerit pitsaassusaat angusimallugu, niuernermik allaffissornermillu ilinniagallit brancheudvalgiani ilaasortat taama isumaqarput. Brancheudvalgimi ilaatigut (Sulinermik Inuussutissarsiutillit Kattuffiat) SIK, (Kalaallit Nunaanni Sulisitsisut Peqatigiiffiat) GA, ILIK-llu ilaasortaatitaqarput.

Ilinniartitaaneq STI Tunngaviusumik Ilinniartitaanermik taallugu 2000-imi taaguuserneqarpoq.