Tunngaviusumik Niuernermik Ilinniartitaaneq – TNI – ukiuni sisamani ingerlanneqartarpoq, Nunaqavissulli Suliffiutillit Kattuffiata, NuSuKa-p, ukiunut marlunnut naalineqarnissaa siunnersuutigaa.
Nuummi Niuernermik Ilinniarfimmi forstanderip, Inger Graven Larsenip, siunnersuut iluarinngilluinnarpaa:
- Tunngaviusumik niuernermik ilinniartitaanerup naalineqarnissaanik siunnersuuteqartoqarmat uaguulluni tupaallannartorujussuuvoq, Nuummi Niuernermik Ilinniarfiup forstanderia Inger Graven Larsen oqarpoq, nangillunilu:- Ukiut sisamat matuma siornatigut TNI aatsaat pilersinneqarpoq. Taamanikkut ukiut pingasuinnaat ingerlanneqartartoq, qinikkanit aalajangerneqarpoq, tunngaviusumik niuernermik ilinniartitaaneq ukiumik ataatsimik tallineqassasoq, Inger Graven Larsen oqarpoq.
TNI-p ilusaa maanna nalilersorneqaleruttorpoq. Kalaallit Nunaanni Sulisitsisut Kattuffiat, GA, KANUKOKA, SIK allallu ataatsimiititaliami ilaasortaasut isumaqarput tunngaviusumik ilinniartitaaneq sivikinnerusariaqanngitsoq, akerlianilli ilinniartitaaneq pitsanngorsarneqassasoq, suliffinnilu misileraasarneq sivitsorneqassasoq.
NuSuKa-p siunnersuutaa malinneqassappat, ukiunillu marlunnik sivisussuseqartumik ilinniartarneq ingerlalerluni, angusassat anguneqarsinnaappat? Inger Graven Larsen aperaarput, imatullu akivoq:- Naagga. Taamaaliorsinnaanngilagut. Tunngaviusumik Niuernermik Ilinniartitaaneq marloqiusatut ingerlanneqartarpoq,
Tassa atuagarsortoqartarpoq, suliffeqarfimmillu misileraasoqartarluni. NuSuKa-p siunnersuutaa malinneqassappat, atuagarsornermi ilikkakkat iluamik misilerarneqarsinnaanngillat, Inger Graven Larsen, naggasiivoq.
Tunngaviusumik Niuernermik Ilinniartitaanerup sivikillineqarnissaannik NuSuKa-p siunnersuutaa piviusunngortinneqassagaluaruni, nunani avannarlerni niuernermik ilinniarfiit akornanni paarlaasseqatigiittoqarsinnanissaa ajornakusuulissasoq Inger Graven Larsen-ip ilanngullugu oqaatigaa.