Timersoqatigiiffiup Kulusummeersup TM-62-ip ajornartorsiutai imaaginnavipput. Nunatsinni angutit isikkamik arsaallutik pissartanngorniunneranni Nuummi ingerlanneqartuni naammassereersuni, peqataareerlutik angerlamut apuunneq ajulerput.
Angutit arsaattartut aqutsisuilu, katillugit inuit 16-it, Kulusummut ullumi uternissartik naatsorsuutigigaluarpaat, Nuummili sila ajormat Kulusummukarnissaat aqagumut kinguartinneqarsimavoq.
Ajornartorsiutilli tamaanga killeqanngillat, tassa utimut bilitsissat akilerneqarsimannginnamik. Akilerneqarsimanngitsunik bilitseqarnerat pissutaalluni iluamik inissaqartinneqarsinnaasimanngillat.
Taamaammat arsaattartut tamarmik Nuummi illorsuarmi timersortarfimmi unnugu unnuitinneqassapput, nerisassatillu nammineerlutik akilertariaqassallugit.
Arsaattartut ilaat Harald Mathæussen radioaviisimut oqarpoq, arsaattartut ajunngitsut, aqaguli ualikkut angerlamut apuutissanerlutik nalornissutigigamikku tamanna nikallungassutigaat.
Arsaattartut Nuummiit Kulusummut timmisartuunneqarnissaannut aningaasanik matussutissanik nassaarniarluni Tasiilap kommuniani aqagu ullaakkut ataatsimiittoqassasoq, Harald Mathæussen ilisimatitsivoq
