Tjodhildip Oqaluffia iluartuutitaassaaq

Nunatsinni kristumiut oqaluffiat siullerpaaq, Thjodhild-ip oqaluffia Qassiarsummiittoq, nunarsuarmiunut tamanut iluartuutitaassaaq. Tassa Narsap Kommuniani Gardar Foundation-ip, aningaasaateqarfiata siunertaa- taannalu biskop-nik arfineq-marlunnik nunanit assigiinngitsunit arfineq-marlunneersunit siulersuisuni ilaasortaatitaqarpoq.

Kisianni siulersuisuni taama inissisimasoqarnera allanngortinniarneqalerpoq siulersuisut aalajangiisinnaanerat eqaannerulersikkumallugu, taama oqarpoq siulersuisuni ilaasortaaqataasoq Qassiarsummiu Erik Røde Frederiksen:

- Tassa immaqa oqarutta ukiuni siuliini pisimasut patsisaapput allanngortitsinissamik isumaliuteqalernitsinni. Siammasissorujussuarnik siulersuisoqarpoq, tassa biskoppit nunanit assigiinngitsuneersut, taavalu uagut biskopperput. Taamaalilluni ataatsimoorniarneq, ataatsimut kattunniarneq ajornartarsimavoq, Erik Røde Frederiksen oqarpoq.

Biskoppit Roskildemiit, Islandmiit, Savalimmiuniit, Norgemiit, Canadamiit, Alaskamiit nunatsinniillu siulersuisuni ilaasortaapput, taamaattumik ukiuni kingullerni aalajangiiniarnerni tamartigut atsiortitseqqaartinnani pisoqarneq ajorpoq.

- Ukiuni kingullerni aalajangiviinissamut periarfissaqartarsimanngilagut.

Neriuutigaaarput siulersuisut ataatsimiinnissaanni aggustusip ingerlanerani pisussani iluatinneqarsinnaasumik siulersuisut inuttalersorneqarneri aaqqinneqarumaartut, Erik Røde Frederiksen aamma oqarpoq.

Soorlu assersuutigalugu immaqa aamma maani nunatsinnut qaninnerusumi najugallit imaluunniit kujataanninnerusut, Erik Røde Frederiksen aperaarput, akivorlu:

- Tassa sapinngisamik isikkoq kujataaniinnerusumik oqarutta eqqornerussooq.

Inatsisartut siulittaasuata Jonathan Motzfeldtip aningaasaateqarfik 2001-mi aallartippaa, tassanilu 2003-imiilli allattaasoq Finn Lynge, allattaanerminit septemberimi tunuassaaq. Gardar Foundation-ip siulersuisui aggustusip 22-niit 25-ta tungaanut nunatsinni ataatsimiissapput.