Københavnimi Kalaallit Illuanni eqqumiitsulianik saqqummersitsineq ippassaq ammarneqarmat tjekkiamiusut, qallunaatut kalaallisullu oqaatsit tusarsaapput.
Saqqummersitsineq tjekkit Danmarkimi aallartitaannit, kalaallisut oqaatsinik soqutigisalimmit, pisortatigoortumik ammarneqarpoq.
Eqqumiitsuliortoq tjekkiamiu, Jan Vojta, qalipakkaminik saqqummersitsisuuvoq.
- Illortaara qallunaamik uinippoq Narsamilu najugaqalerlutik. Kalaallit Nunaannut tikeraarsarpaannga 1988-imilu Narsamukarpunga. Taamanikkulli qalipaasarninni Kalaallit Nunaat isumassarsiorfigisalerpara, Østrigimullu uteraluarama Kalaallit Nunaat isumassarsiorfigiuarpara ullumikkumut, Jan Vojta oqarpoq.
Jan Vojta eqqumiitsuliornermik inuussuteqartoq, Kalaallit Nunaanni saqqummersitsinissamik takorluugaqarpoq.
- Qalipakkakka Kalaallit Nunaanniik isumassarsiorfigisakka sumiiffinni assigiinngitsorpassuarni saqqummersinneqarnikuupput, takorluugaraaralu siunissami Kalaallit Nunaanni saqqummersitsinissara. Jan Vojta oqarpoq.
Kalaallit Illuanni saqqummersitat 21. januarip tungaanut takuniarneqarsinnaapput.