Tivolip Kopenhagen Furimik Great Greenlandimillu suleqateqarnini ingerlateqqippaa
Uumasunik illersuiniaqatigiit, uumasullu amiinik nioqquteqartarnermut akerliusut, Tivolimut taamani assuarlerujussuarput, Tivolillu Facebookianut kamaqalutik allaqattaarlutik.
Tivolili ernummateqanngilaq, Great Greenlandilu nutaamik isumaqatigiissuteqarfigeqqammerpaa.
Tivolimi pisortaq, Lars Liebst, aningaasaqarneq pillugu nutaarsiassaqartitsiviup Ritzauip nittartagaanut, Ritzau Finansimut, oqarpoq, Kalaallit Nunaanni ammerivimmik suleqateqarneq, juullikkunnilu saqqummersitsineq Tivolimut aggiasoqarneruneranik kinguneqanngitsoq. Qallunaat 857.000-it missaat siorna juullikkunni Tivoliliarput, ukiumut siulianut sanilliullugu amerlanerunatik.
- Suleqatigiilluartorujussuuvugut, Great Greenlandilu suliaminik taamaalilluni takutitsilluarpoq, Lars Liebst oqarpoq.
Great Greenlandilu suleqatigiinnertik taama qisuariarfigineqarmat taassuma eqqumiigilanngitsuunngilaa, amminimmi nioqquteqarnerup Danmarkimi ukiuni aggersuni annertusarneqarnissaa naatsorsuutigineqarluinnarmat.
- Amminik nioqquteqarneq annertusarniarlugu Danmarkimi ministerit Kinamukaraangata ataatsimilluunniit naammagittaalliortoqarneq ajorpoq, Tivolimi pisortaq oqarpoq, Danmarkimilu ammeriviit pitsanngoriartuinnarnerat nuannaarutiginerarpaa, Danmarkimi minkiuteqarfippassuarni uumasut taakku atugarissaarnerulersimanerat eqqarsaatigalugu taama oqarluni.
