Tivolimi tunisaqarluarsimapput
Tivolimi 32-issaannik Kalaallit Nunaata ulloqartarnera iluatsilluartutut Tivolip tusagassiisarfianit nalilerneqarpoq.
Tivolip tusagassiisarfianit Ellen Dahlip Tivolimut isersimasut ukiup siulianitut amerlatiginerarpai.
- Ippassaq ulloq Tivolimut isertut amerlapput 36.000-iugamik. Tassami Tivolimi kalaallit aggustip aallaqqaataasiortarneranni isertartut amerlajuaannarput. Pisussanullu soqutiginnillutik takkuttartut amerlasaqaat, soorlu ukiumoortumik takkuttuaannartoqartarluni, Kalaallit Nunaannut attuumassutilinnik soqutiginnittunillu allanik. ”Kalaallit Nunaat Tivolimi”-p ulluni pingasuni ingerlanneqarnera taamaalilluta malinnaavigineqarluartoq oqaatigisinnaavarput, Tivolip tusagassiisarfianit Ellen Dahl oqarpoq.
Ulluni pingasuni juulip 30-aniit aggustip aallaqqaataanut inuit 70.000-it missarluinnaat Tivolimut isersimapput.
Tivolimi Kalaallit Nunaannik nittarsaasseqataasut peqataanertik aamma iluatsilluartutut nalilerpaat. Ejvind Elsner Atlantic Music-imeersoq oqarpoq, nipilersornermut tunngasunik assut tunisaqarluarsimallutik, katillugit 3-400-nik, taakkulu qallunaajunerusunit pisiarineqarsimasut, Ejvind Elsner ilisimatitsivoq.
- Rasmus Lyberth-ip CD-liai soqutigineqarput-aasiit, aammali Angu, Julie, Kimmernaq, nipilersoqatigiillu Inneruulat aamma Sume tunisaalluartunut ilaapput, oqarpoq.
Atlantic Musicip nutaatut saqqummersitassai, nipilersoqatigiit Hans Mortensen ilaalu Alter Me-mik imminnut taasut aamma soqutineqarsimaqaat, taakku Nuuk Festival-eqarnerani appisimaaqqissapput, CD-liaallu siulleq oktobarimi saqqummissaluni.
Tivolimi appisimaartut arlaqarsimapputtaaq. Ole Kristiansen nunatsinnit Københavnimut tikiinnavilluni Tivolimut tusarnaartitsiartorpoq, taamaalillutillu 32-ssaanik Kalaallit Nunaat Tivolimi-qarneq ippassaq unnukkut unnuaqeqqarluinnalersoq nuannarineqarluartumik naggasersinnaasimallugu.
