Tivolimi Nunatsinnut tunngasunik ulloqartitsinissaq aqagu aallartissaaq

Tassami isiginnaartitsissut Innersuit ukiumoortumik taamatut aaqqissuussisarnermi ukioq manna  soqutigineqarluassagunarmat.

Isiginnaartitsissut taanna Nunatsinni isiginnaartitsissutigineqareerpoq, tassa NAPA-p Danmarkimi Rollespilsakademiet suleqatigalugu sinerissami isiginnaartitsissutigisareermassuk, maannalu tassa Tivolimi Nunatta ulloqartinneqarnissaani immikkut soqutigineqassagunarluni.

Tivolimi Nunatsinnik ulloqartitsilluni aaqqissuussisarnerni pisussat ukiut siuliinut naleqqiullugit ukiormanna ikilineqangaatsiarput, tapiissuteqartartut ikileriarnerat matumani peqqutaatinneqarluni.

Ilaatigut qaannamik kinngusaqattaarnerit peerneqarsimapput. Ukioq manna pisussanut aningaasat atugassat 300.000 koruunit missaanniittut, 2001-imili taamatut aaqqissuussisoqartalermalli aatsaat taama ikitsigipput.

Taamaakkaluartoq aaqqissuisut nipilersortussanik aaqqissuisinnaasimapput, ilaatigut nipilersussallutik Nanook, Malu Rohmann Fleischer, Small Time Giants aamma Rasmus Lyberth.

Tivolimi Nunatsinnut tunngasunik ulloqartitsinissanut pilersaarutit nittartakkami git.gl-imi takuneqarsinnaapput.