Tivoli ornigarneqarluarsimavoq

aggustip 02-at 2005 10:33

Kalaallit Tivolimi ulloqartitsinerat, ullunik pingasunik sivisussuseqartoq, naammassilluarpoq. Ukioq manna isertut 74.000-iupput, siorna 103.000-it isersimasut. Ukioq manna isertut siornamut naleqqiullugit ikinnerugaluartut inernera aaqqissuisut iluarisimaarpaat, ulluni taakkunani sila aamma pitsaavallaarsimanngimmat.

- Siallernera sunniuteqarpoq, malugisinnaasimavarpullu, kalaallit isertut amerlanerusimasut, takornarialli illup iluani takornariarneqarsinnaasut orniginerusimagunaraat. Kalaallit Tivolimi Peqatigiiffianni siulittaasoq Sidcsel Møller.

Tivolimi aappaagu ulluni pingasuni aaqqissuisoqaqqissanersoq suli nalunarpoq, ullulli qassiugaluarpataluunnit kalaallit ukiumoortumik naapittarnerat Tivolimit nuannaarutigineqartaqisoq, Tivolip pisortaa Lars Liebst erseqqissaavoq.

- Kalaallit tamaani naapittarnerat tulluusimaarutigisarparput, qiperugarlu kalaallit Tivolillu ikinngutigiinnerannut takussutissiivoq. Lars Liebst Christian Nuunu Rosingip qiperugaa assilialiaq ippassaq uleerneqarmat taama oqarpoq.