Titartakkat suli akerliussutsimik takutitsissutaasarput

Pakistanimi pissutsit ajorsilluinnarmata, danskit nunanut allanut ministeeriaqarfianit tallimanngormat aalajangerneqarpoq, Pakistanimi ambassadi Islamabad-imiittoq matuneqassasoq.

Muuamaamik titartakkat Arabiamiut nunaannit arlalinnit akerlerineqarnerujussuat unikaallakkiartoraluartoq, nunarsuarmi muuamaakkusiorfiunerpaani Pakistanimi Indonesiamilu akerliunerit suli ingerlapput. Aamma Tyrkiami inuit 10.000-it akerliussutsimik ullumi takutitsisut, DR oqaluttuarpoq.

Pakistanimi naalakkersuisut ippassaq naalakkiipput akerliussutsimik takutitsineq inerteqqutaassasoq, taamaakkaluartoq Pakistanimi politikerit illuatungiliuttut MMA-t akerliussutsimik takutitsinissamik ullumi kajumissaaripput. Politiit sakkutuullu akerliussutsimik takutitsinianik assersuigaluartut, akerliuniat 100-nik sinneqartut illoqarfimmut Islamabad-imut isaapput, illoqarfimmiorpassuarnilli ilannguffigineqarlutik. Taamaakkaluartoq akerliusut ujaqqanik millooqisut, suli danskit ambassadeanut parlamentimullu anngutinngitsut, politiinit sakkutuunillu unitsinneqarput.

Akerliunnermut pissutaasunut ilaavoq Pakistanip præsidentia USA-p peqqarniisaarnianut akiuunniarneranut tapersersuimmat, sulili muuamaamik titartakkat pissutaallutik danskit erfalasuat akerliusunit ikuallanneqartarpoq.