Titartakkanik filmiliarujussuaq ilisaritinneqarpoq
Kalaallit Nunaanni pinngortitaq piorsarsimassuserlu oqaluttuatoqaatitsinnik imalik europamiut TV-kkut isiginnaarsinnaassaneraat ullumi paasinarsissaaq. Titartakkanik filmiliarujussuaq, Mikisoq, Europami TV-qarfinnut katillugit 17-nut massakkorpiaq ilisaritinneqarpoq. Mikisoq 26-nut immikkoortunngorlugu aamma TV-koorusiarineqartussaavoq.
Mikisup ilisaritinneqarnera Pyrenæerini franskit illoqarfianni Pau-mi pivoq. Titartakkanik filimiliortartut Pau-mi ulluni makkunani festivalertinneqarput.
Mikisumik filmiliortut namminneq naatsorsuutigaat filmiliartik tigulluarneqassasoq.
- Manna tikillugu tamanit nersualaarneqartorujussuuvugut.
Kalaallit Nunaanni pinngortitarsuarmik avataaniittumillu, oqaluttuatoqqanik, piorsarsimassutsimik pinngortitamillu inuttaritinneqartup Mikisup avatangiiseqartitaanera inunnit alutorineqaqaaq, filmimi ilitsersuisoq, Jesper Møller, A-Filmimeersoq, oqarpoq. Titartakkanik filmiliani nuannarineqaqisuni ”Asterix” aamma Terkel i knibe” Jesper Møller aamma ilitsersuisuuvoq.