Titartaasartumut saassussisup parnaarussaanera sivitsorneqarpoq

Somaliamiu 28-nik ukiulik, Muuamaamik illaruaatigalugu titartaasumik, Kurt Westergaardimik, toqutseriaraluartut pasisaasup, parnaarussaanera sapaatip akunnerinik sisamanik ullumi sivitsorneqarpoq.
januaarip 27-at 2010 11:29

Angut taanna immikkoortitaalluni sapaatip akunnerini sisamani kingullerni parnaarussaassaaq. Peqqarniisaarniartut paragaraffiannik unioqqutitsisimasutut somaliamiu eqqartuussivimmit pasineqarpoq. Taannami ulimaannik tigumiartoq Kurt Westergaardip angerlarsimaffiani tigusarineqarpoq.

28-nik ukiulik pinngitsuunerarpoq, oqarluni, titartaasup toqunnissaanik eqqarsaateqarsimanani.

Peqqarniisaarniartutut pasilliineq pissutigalugu suli sukumiinerusumik misissuisoqartussanngorpoq, politiimmi uppernarsarniarsarissavaat titartaasup angerlarsimaffianut pasisaasup isernera tassaasoq inuiaqatigiinnik qajannarsaaniarneq killiligaananilu oqaaseqarsinnaanermik killiliniarneq.

Sverigimi Københavnimilu - immaqa aamma Kenyami - misissueqqissaartoqassaaq, 28-nimmi ukiulik aamma Nairobimiissimammat.