Titartaallaqqissut pikkorissarnissamut periarfissinneqarput

Titartaallaqqikkuit tamatumunnga pikkorissarnissamut periarfissinneqarputit, tassami Namminersornerullutik Oqartussani Inuussutissarsiornermut, Suliffeqarnermut, Inuussutissarsiutinullu ilinniartitaanermut aqutsisoqarfik eqqumiitsuliortutut piginnaanillit misilerarneqarnissaannik pikkorissarnissamut periarfissiivoq, taamatuttaaq peqataasut qanoq iliorlutik piginnaasaminnik ineriartortitseqqissinnaanerminnik siunnersorneqassapput.
oktobarip 20-at 2008 06:59

Pikkorissartitsineq sapaatip akunnerinik marlunnik sivisussuseqartoq Nuummi Viborgimilu ingerlanneqassaaq. Suliamik tamatuminnga ingerlatsisuussalluni Kalaallit ingerlatseqatigiiffiat Mikisoq Production, taamatuttaaq siunissami pilersaarutaavoq, inuusanik aalasunik filmiliassaq Mikisumik qulequtaqartoq suliarineqassasoq.

Pikkorissarnerup ingerlanerani titartaariaasitoqqat, qalipaaneq, titartakkanik filmiliassanut titartaaneq, qarasaasiat atorlugit ilusilersuineq taakkualu piareersarlugit programiliorneq ilaatigut ingerlanneqarniarput.

Pikkorissarnerit – angalaneq najugaqarnerlu peqataasunut akeqartinneqassanngillat, qinnuteqaatillu titartagartallit qarasaasiakkut uunga nassiunneqassapput kreativttalent@greennet.gl.