Tissiartaat hashimik usisoq ikuallanneqarpoq

Hashimik eqqusseriarnerit annersaanni tissiartaat atorneqartoq angutinillu marlunnik inuttaqartoq, 118 kiilumillu hashimik usisoq maanna aserorterneqarsimalerpoq.
aggustip 06-at 2010 13:19

- Tissiartaat sequtserneqareerpoq. Seqummai Nuummi saviminernut eqqaaviup eqqaaniipput, Kalaallit Nunaanni politimesteri, Bjørn Bay oqarpoq.

Tissiartaatip sequtserneqannginnerani atortui tamarmik akitsorterussinikkut tuniniarneqareerput. Aningaasat isertitat danskit naalagaaffiata karsianut nakkartussaaneri Nunatsinni politiit akisussaaffigaat.

Politiit angallat tuniniarsimanngilaat, politimesterip Bjørn Bay-ip oqarnerata naapertorlugu angallat isumagineqarsimanngigaarmat imminut akilersinnaasimanngilaq tuniniassallugu. Tissiartaat nunamut qaqinneqaramili Nuummi politeeqarfiup tunuanut inissinneqarsimavoq, ukiorlu naallugu apummik matusaasimalluni.

Eqqartuussinerup naammassinnginnerani arsaarinnissutit politiinik tuniniarneqarneq ajorput. Tassami eqqartuussinerup inernera Nunatta Eqqartuussivianut ingerlateqqinneqassangaluarpat, arsaarinnissutip tunineqarisimanera atuuttussaajunnaarsimassagaluarmat.

Hashi 118 kiilu juunip qiteqqunnerani Nuummi eqqaavimmi ikuallanneqarpoq. Ikuallatassallu annertuallaarnera pissutigalugu 15 kiilukkaarlugu ikuallanneqarpoq.