Tissiartaat atorlugu Sullualukkoortoqarpoq
Tusagassiortoq Canadamiu Cameron Dueck pingasunik angalaqateqarluni Sullualukkooqqammerpoq.Tissiartaat 40 fodsiusoq 'Silent Sound', British Columbiamit juunimi avalappoq, kangimullu ingerlaarnermini Sullualukkoorluni.
Allattoq Mads Lynge
septembarip 21-at 2009 08:06
Ukiualunnguit matuma siornatigut taamaaliortoqarsinnaanngikkaluarpoq.
Silap pissusaata allanngoriartornera ersersinniarlugu angalasoqarpoq, umiarsuillu sikunik aserorterutit atornagit Sullualukkoortoqarsinnaanera aamma takutinniarneqarluni.
Nunaqarfippassuit aqqusaarneqarput, taakkununnga ilaallutik Ikaasuk aamma Iqaluktuutsiaq/Eqaluttuutsiaq. Tamaani nunaqarfimmiut oqaloqatigineqartarput.
Silap pissusaata allanngoriartornera innuttaasunit ernummatigineqarpoq, nunami inuuffigisartik imarlu isumalluutigaat, inuussutissatik tassanngaanniit pisaramikkit.
Tissiartaammik angalaneq oktobarimi naammassineqassaaq, Canadap kangisissuani Nova Scotiami angalaneq naggaserniarneqarami.
