Tingerlaataasalerlutik sisorartartut rekortiliipput
Derek Crowe Devon McDiarmidilu Canadameersut Adrian Hayes Tuluit Nunaanneersoq siuttoralugu Sermersuaq avammut sinerlugu siorna ulluni 67-ini angalapput.
Angalaqatigiit taakku pingasut Gunessimit uani sapaatip-akunnerani attavigineqarput oqaluttuunneqarlutillu angalanerat issittumi tingerlaasalerluni angalanerit isorartunersarigaat. Nittartakkami Icenews.is-imi tamanna allaaserineqarpoq.
Kujataaniit avammut utimullu angalanerat katillugu 3.120 kilometerinik isorartussuseqarpoq.
Taamatullu rekortiliinerup ingerlaannaq qaangerneqarnissaa Derek Crowep ilimaginngilaa.
- Siornatigut taamatut iliorluni rekortiliisoqarsimannginnera nassuiaatissaqarluarpoq, tassami angalanermi qattunerpassuit aqqusaagassaapput, aammalu anorip sammivia imaannaanngeqaluni, Derek Crowe oqarpoq.
Sermersuakkut angalanermi kingorna siffissamigut suli anniartarluni Derek Crowe oqaluttuarpoq.
Taamaattoq misigisat nuannersut ilungersunartunit eqqaamajuminarnerutippai:
- Ikinngutit ilagalugit Sermersuakkut tingerlaasersorluni sisorarneq misigisaavoq puigunaatsoq, Derek Crowe oqarpoq.