Tingerlaaserlutik Sermersuarmik itiviiniat

Franskit tallimat sisoraaserlutik sermersuaq itivinnialerpaat. Ukioq manna apriilip qeqqata missaanni aallarnerneqartumik sermersuaq itivinniarneqarpoq. Ingerlaarnermullu nukiit atugassat nalinginnaasuunngillat. Pilersaarutaavormi qullartartuliamik tingerlaaserluni ingerlaartoqarnissaa.

Franskeq nunatsinni issittumilu ilisimaneqarluartup, Paul Emile Victorip, toquneraniit ukiut qulit qaangiuttullu franskit taakku tallimat taamaaliornermikkut nunaqqatertik eqqaaniarpaat.

Sermersuarmik itiviiniartut siuttuat Olivier Pezeron USA-mi tusagassiisartunut Entertainment News-imut taama oqarpoq.

Paul Emile Victorip 1936-imi sermersuaq itivippaa, taamanikkulli nunatta kitaanit kangimut ingerlaartoqarpoq. - Kimmut ingerlaarluta sermersuaq itivinniarparput, taamaaliornikkut qullartartuliat atorlugit ingerlaarsinnaaniassagatta, Olivier Pezeron oqarpoq.

Franskit tallimat pilersaarutigaat qaammat ataaseq ingerlaassallutik. Pilersaarutaavormi ullormut akunnerit qulit ingerlaartarnissaq.