Assi: Ilisimatusarfik

EVA-rapport Tine Pars: Utoqqatsissutissaqanngilaq

Ilinnarfissuarmi ilinniarnerup qaffasissusaa appasippallaarpoq, ilinniartitsisunngorlaallu meeqqat atuarfianni sulilernissaminnut piareersimanngillat. Naliliisarfiup EVA-p nunatsinni ilinniartitsisunngorniarfik nalilereeraalu immikkoortortaqarfimmi pisortaq Ilisimatusarfimmi rektorimit Tine Parsimit taarserneqarpoq.

Apeqqutaavorli, sooq rektori, ukiuni arfineq-marlunni rektoriusimasoq, Ilinniarfissuarmi pissutsit pillugit siusinnerusukkut iliuuseqarsimanngila?

 -Immaqa aperisoqarsinnaavoq 'sooruna rektoritut aallartikkamali Ilinniarfissuaq nalilertissimanngikkiga', kisianni qanorsuarluunniit utoqqatsissutissarsioraluarutta iluaqutaanavianngilaq, siumut ingerlasussaagatta, Ilisimatusarfimmi rektori Tine Pars KNR-imut oqarpoq.

Aamma atuaruk Ilinniarfissuaq EVA-p naliliinerani angusinngitsoortoq

Nunatsinni ilinniarfimmut pisoqaanerpaamut ataqqinnittoqarsimanera Tine Parsip ilaatigut nassuiaatigaa. 
-Pissutsit Ilinniarfissuarmi atuuttut immaqa aamma pissusissamisoorpoq taakkartulaassallugit. Ilinniarfissuaq ilinniarfiuvoq qangarujussuarlili piusimasoq, taava aappaattut aamma sulineq pillugu isumaqatigiissuti atorneqartut, isumaga naapertorlugu ineriartortitsinermut inissaqartitsisimanngillat, rekori aamma oqarpoq.

Tassalu sulineq pillugu isumaqatigiissutit Ilisimatusarfimmik aqutsisut iliuuseqarsinnaanerannut killiliisutut tikkuarlugit. 

Ilisimatusarfimmi ilinniarfiit allat aamma nalilersorneqassanersut, taakkualu siunissamik aarleqqutisssaqarnersut aperiganni, maannakkorpiaq nalilersuinernik ingerlasoqanngitsoq Tine Pars akivoq. 
 -Naatsorsuutigilluaqqissaarpara naliliinerup innersuussutai suliarissallugit aallartilluarumaartut, siunertaqarluarnissai takorloorpara. Aammalu sulisut aqutsisullu nutaat tatigilluinnaqqissaarpakka ingerlatsisinnaassasut aqutsisinnaassasullu, ajunngitsup tungaanut ingerlanissamut, Tine Pars oqarpoq.

Aamma atuaruk Rektorip Ilinniarfissuarmi pisortaq taarserpaa

Ilisimatusarfik isumasioqatigiinnissamut pingasunngorpamut aggersaavoq. Tassani EVA-p naliliinerata inerneri ilaatigut qinikkanut saqqummiunneqarlutillu taakkunannga oqaluuserineqassapput. 

Ilinniartitaanermut Naalakkersuisoq Nivi Olsen radioaviisimit oqaaseqartinniaraluaratsigu iluatsinngilarput. Taanna isumasioqatigiinnerup kingorna aatsaat  oqaaseqarusuppoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl