Tine Bryld: Herstedvester eqqartuussisutut inissippoq

Ole Møller, pinngitsaaliisimasutut killiligaanngitsumik Herstedvesterimi pineqaatissinneqarsimasoq, misiligummik anisinneqarsinnaanngortoq, Aasianni eqqartuussivimmi novembarip ulluisa qulingiluaanni aalajangerneqaqqippoq. Taamatulli aalajangerneq ingerlaannartumik Nunatta eqqartuussivianut ingerlateqqinneqartussanngorpoq. Ole Møllerimut tunngatillugu suliamut malinnaasimasoq, atuakkiortoq Tine Bryld, isumaqarpoq, suliap ingerlanneqarnera naammaginanngitsoq.

- Ukiup ataatsip matuma siorna, Aasiaat eqqartuussiviata aalajangerpaa, piumasaqaatitalimmik Ole Mølleri misiliummik anisinneqassasoq. Maannakkut aamma tusakkakka malillugit, Ole Mølleri nakkutiginninnertalimmik misiliummik anisinneqarsinnaasoq, Aasianni eqqartuussivik aalajangerpoq. Ingerlaannartumilli Nunatta Eqqartuussivianut ingerlateqqinneqarpoq, Tine Bryld oqarpoq nangillunilu: - Naak eqqartuussisarnerit arlallit ingerlanerini Ole Mølleri ajorsartinneqartarsimagaluarluni, Aasianni eqqartuussivik isumaqarpoq, Ole Møller-i ingerlalluarsimasoq. Taamaammat uagut isumaqarpugut Ole Møller-ip misiliummik anisinneqarnissaa piffissanngoraluartoq, Tine Bryld oqarpoq.

Kalaallit Nunaanni eqqartuussiviit assigiinngitsut aalajangiisarsimaneri, Herstedvesterimit tusaajumaneqartannginneri Tine Bryld-ip uparuarpaa.

- Kalaallit Nunaanni eqqartuussiviit qanoq aalajangiisarneri Herstedvesterip malittariaqarpai. Kalaallit Nunaanni eqqartuussiviup ukioq kingullerli aalajangigaa naammassiniarlugu, Herstedvesteri sulilluni aallartittussaasimagaluarpoq, oqarluni: - Kalaallit Nunaanni eqqartuussiviit aalajangersimapput Ole ingerlalluartoq, taamaammat anigallartinneqarnissaanut piareersartariaqarpugut. Taamatulli iliunngilluaasarput, Tine Bryld oqarpoq nangillunilu: - Herstedvesteri isumaqarpoq, nammineq malittarisassatik malillugit ingerlasoqassasoq. Tusarsimanngisaannarparalu sumiluunniit paarnaarussivik eqqartuussivittut atorneqartarsimanera, Herstedvesterimi eqqartuussisutut imminut inississimavoq, Tine Bryld naggasiilluni taama oqarpoq.