Tine Bryld akissarsitinneqarpoq
Suliat pillugit atuakkiortut akissarsititsinerat 2005-imoortoq ukiormanna atuakkiortumut nunatsinni aamma ilisimaneqarluartumut Tine Bryld-imut tunniunneqarpoq. Akissartitsinerup saniatigut aningaasat 30.000 koruunit Kultur-ministeriaqarfimmiit aamma tunniunneqarlutik.
Tine Bryld-ip akissarsitinneqarneranut peqqutaanerpaavoq nunatsinni pissutsinut allaaserinnittarsimanera. 1992-mi atuagaq kalaallinik Herstedvesterimi parnaarussanik apersuineranik imalik saqqummerpoq, ukiorlu taanna Abel-i 18-nik ukiulik Narsameersoq ukiortaap ullaavani ikinngutiminik arfineq marlunnik toqutsisoq pillugu atuakkiaa aamma saqqummersinneqarluni.
Kalaallit meerartai inuusuttuarartaalu pillugit sisamanik allanik atuakkiaqarpoq kalaallisut aamma saqqummersinneqartunik. Tine Bryld kalaallit pillugit atuakkiortarnera kalaallit soqutigineqarnerannut ajornartorsiutaannillu paasinninnerulersitsivoq.
Tine Bryld-ip tusaamaneqaatigaa sulinermi tamaat meeqqat inuusuttullu pisinnaatitaaffii atugarisaasallu pitsaanerulernissaannik sorsuutiginnittarnera. Atuakkiai allat tassaapput meeqqat aqqusinermi inuuneqartut pillugit atuakkiaq, ilaquttaminnik atoqatigiinnermi atornerlunneqarsimasut inuusuttunillu pinngitsaaliinerit pillugit aamma atuakkiaqarluni.
